個市唔落得，就要上。幾隻大地產股，低位承接力強，短線可以睇好啲。揀已調整嘅地產股然後炒佢哋嘅C輪，搵銀之道。
新世界C輪9667：新世界（017）收8.20元，跌0.20元。同上月24日高位9.25元比較，調整1蚊有多，隨時彈畀你睇。紅灣半島事件一鑊泡，啲人鬧嘅係政府手法，當然亦有環保團體矛頭指向發展商。但做生意，講法律精神，在商言商，去到尾，紅灣半島拆建，居屋變豪宅，地產商賺多幾十億，新世界透過所揸51%嘅新創建（659），分錢分到笑。新世界股數只係34.6億股，分三幾十億，每股就分得1蚊，好易計。
新世界主角C輪9667，跟正股跌，收10.1仙，跌8%，正合低價買嘢原則。明年2月到期，溢價9.6%，槓桿率9倍（有效5.2倍），引伸波幅58.7%。咪認為溢價過高，因為重有大把日子，而且正股唔係瞓覺股，郁幾毫，隻輪即時變摩天輪，9667交投大增，有嘢睇。
新地C輪2252：新地（016）昨日再跌0.50元，新地跌後隨時上番，要搵C輪炒。3520與3585呢兩隻明年5月與6月到期嘅C輪，逐漸成為主角，但數據始終係2252靚好多，短炒揀2252。正股若然上到84元，隻輪值1元，高過𠵱家0.59元接近7成。隻輪明年2月到期，到期前正股見84元，唔係冇機會也。
長實C輪4460：長實C輪一對孖寶2249與2258，地位逐漸俾4460取代。長實（001）有勢，4460炒得過，明年3月到期，輪價55仙，溢價3.7%，槓桿率13.6倍（有效8.7倍），引伸波幅26.4%。
章盛