老董經常喺禮賓府招呼達官貴人，負責伙食嘅伙頭大將軍責任重大，特首辦日前登報請合約廚師，事關現職大廚夠鐘退休，要請番位接班人掌廚。
特首辦對新廚師要求唔簡單，除咗要精通中菜，重要有西菜同東南亞菜知識，曾喺豪門大戶服侍過富豪或做過大酒店師傅更係必要條件。
禮賓府廚師唔止要煮得，重要有諗頭，因為要幫手設計菜單，亦要不定時工作同住宿舍，月薪一萬五千六百元，兩年合約期滿有一成五約滿酬金，政府發言人話呢次請新廚師冇減人工，即係禮賓府廚師幸免唔受公務員減薪影響。
又老董今日會同教育界見面，佢呢個月忙於做施政報告，不過，二十號胡錦濤同溫家寶去澳門，佢幾唔得閒都要去吓。
傳真︰2623-9278
電郵︰