恒生銀行大班鄭海泉明年榮升滙豐銀行第一位華人主席，八方第一時間恭喜咗佢。呢位真正嘅鄭大班有今日嘅成就，當然係有佢過人之處，特別係佢鍥而不捨，力爭上游嘅精神，更值得年輕人學習。
話說佢當年喺九龍工業中學畢業之後，本來已投身社會，喺中電做個小職員，但係佢志不在此，於是再去九龍總商會英文中學讀預科，並成功考入中文大學新亞書院讀經濟。
七三年大學畢業後，佢有意想繼續修讀碩士班，點知由於佢大學時期甚為活躍，又係中大學生會副主席，甚至被英國人形容佢係十四名需要監控嘅「新左翼」激進分子之一，結果主考嘅邢慕寰教授一聽到佢嘅理想係「為人民服務」，面色有點不悅，最後就冇收佢。
所謂「塞翁失馬，焉知非福」。鄭海泉後嚟去咗新西蘭留學，回港後加入滙豐，由低做起，至今吐氣揚眉。鄭大班話佢嘅恩師郭益耀教佢比較經濟學，所以佢熟讀馬列；參加學運，學識唱南泥灣同國際歌，結果劃成新左派，認真好笑，咁香港今日已回歸祖國，呢啲往績可能有分加。
傳真︰2623-9278
電郵︰