《22世紀殺人網絡終極DVD套裝》雖然好正，不過行貨建議價要成$625，真係未必咁多人花得起，所以論上星期熱賣3區DVD就未輪到佢喇！據旺角碟舖嘅探子回報，最好賣3區碟反而係《王者無敵》同《加菲貓》！
記者：朱崇德
《王者無敵》故事發生在被稱為「黑暗時期」的公元5世紀，當時的英國已被羅馬人管治達300年之久，隨着強大之師——撒克遜人（Saxons）的入侵，羅馬人決定棄英撤走；正值兵凶戰危之際，傳說石中神劍之王者——阿瑟王，串聯起一眾圓桌武士、貧民及土著戰士，頑抗這些侵略者，因而成為各族擁護的首位「英王」。
雖然《王》在香港戲院上映時票房一般，不過細心觀賞後，感覺是故事真係相當唔錯，好有當年《驚世未了緣》嘅大時代加愛情故事嘅感覺，場面效果亦唔輸蝕畀《木馬屠城》！能成為本周最熱賣DVD亦並非無因；當中特別推介是中段對野蠻人，同片末最後一場大混戰，場面絕對震撼，要細心觀看。
劉青雲聲優抵死啜核
年屆26歲的加菲貓，終由平面漫畫角色搖身變成3D動畫，並首度登上大銀幕！故事講述「奴隸主人」阿北，為了討好夢中情人女獸醫，竟然收留了加菲最憎嘅動物——狗仔阿的返屋企，呷晒醋嘅加菲於是諗計趕走阿的；點知，阿的真係失蹤咗！原來係俾貓狗主持人卓開心捉了。為擺平因自己呷醋而闖下嘅大禍，加菲變身正義朋友，重勇敢到處男出城，瞓晒身救阿的。論娛樂性，絕對係星期日一家大細開開心心「公餘場」笑片。儘管好多人話佢得啖笑，不過對於一眾加菲Fans，睇見佢嘅「星期一憂鬱症」、闊條麵，再懷緬吓細路哥睇漫畫版加菲嘅樂趣，真係大人同小朋友都一樣睇得咁開心！
不得不提是電影有粵語版配音，聲優演出者是劉青雲（飾加菲貓），絕對比英語版更抵死啜核，將加菲貓嘅尖酸刻薄性格表現得淋漓盡致，值得推介。