「黃霑博士追思會」昨午於香港大球場舉行，與黃霑相戀十四年的舊愛林燕妮一如日前所言未有出席，但她昨日表示有留意相關報道，更指悼念霑叔好應該。而林燕妮前晚接受訪問時，表示對舊愛的思念將永遠長存心中，更帶淚遙祝黃霑開心。
林燕妮昨日未有現身舊愛黃霑的追思會，事後她接受本報記者電話訪問時，聲線較平日顯得更見沉重和哀傷。問到她對追思會有何感覺時，林燕妮說：「冇，我都冇睇，我睇咗新聞啫，悼念霑叔係好應該。」
冇人了解我同佢之間嘅感情
林燕妮又為霑叔的事業抱不平說：「佢一生同香港人一齊成長，陪香港人長大，係應該悼念霑叔。不過佢在生時，啲人唔肯搵霑叔寫詞，冇人為此出聲，死後歌功頌德、打鑼打鼓又有乜嘢用？」
拒絕透露身在何處的林燕妮又說：「我嘅心情唔需要話畀人聽，亦唔需要同人講。我點樣悼念霑叔係我嘅事，冇人會了解我同佢之間嘅感情。」
另一方面，林燕妮前晚接受有線娛樂新聞台訪問，她強調自己只是黃霑生命中的一個過客，並不是對方的妻子，不知道該用甚麼身份去講任何說話，又自言霑叔在她生命中亦只是一個過客，更在訪問中超過六次提到霑叔欠她一個名份。
自去年底，兩位胞弟林振強、林振剛和舊愛霑叔先後辭世，問到林燕妮的心情是否已平復時，她說：「點可能平復？思念一個人嘅心情係冇得平復，佢哋永遠都長存喺我心目中。」說到此處忍不住輕拭眼淚，更手指上天說：「遙祝細佬（指林振強和林振剛），阿霑（黃霑）開心。」
對於沒有出席追思會而被指薄情一事，林燕妮反駁說：「我用乜嘢身份出嚟？如果佢屋企人叫到，我一定去，但冇人聯絡過我。」她又表示即使不出席追思會也會在家中追思，欣賞霑叔生前的電影如《大家樂》等。
以前我識嘅黃霑唔喜歡低調
提到顧嘉煇因未能出席霑叔喪禮送故友最後一程而極度失望，林燕妮歎道：「我好明白煇哥心情，但冇辦法，以前我同James（黃霑）一齊，佢都係不拘泥世俗，以前佢同我講，話如果佢死嗰日，最好播佢講笑話嘅帶畀大家睇，大家開party，以前我識嘅黃霑唔似喜歡咁低調，可能分開之後改變咗都唔定。」
林燕妮又為霑叔抱不平說：「記得有段時間冇人搵佢填詞，冇人欣賞佢，佢好唔開心，話𠵱家啲人填嗰啲歌詞全部係垃圾，點解當年啲人唔好好珍惜佢才華，要等到佢死之後先至話可惜？」她表示相信霑叔事業上的低潮，或多或少影響到二人間的感情。
而霑叔的妻子陳惠敏Winnie原來是林燕妮母親契新抱的胞姊，當年林燕妮在母親介紹下認識對方，更讓她到「黃與林」公司任職，結果Winnie卻愛上天才橫溢的霑叔。林燕妮表示當年Winnie給她的印象十分外向、活潑和友善，每天均會為同事買早餐，又主動說要到林燕妮和霑叔的家吃飯，跟現在低調作風截然不同。
有限選擇下揀錫自己嘅女人
林燕妮說：「試過一次，Winnie傳真去我哋屋企，裏面有好多暗號，我點會唔知乜事吖，我問黃霑做乜嘢，佢就好輕描淡寫咁話：『佢鍾意我。』當時我真係好唔高興，我打電話畀Winnie，請佢尊重吓我，唔好再傳真去我屋企，我又影印一份心經同英文寫咗幾句說話畀佢，話：『假如有日我同James分手，都同你冇關。』」當被問到當年和霑叔分手是否與Winnie有關時，林燕妮想了一會兒，然後說：「唔覺得，之後黃霑喺有限嘅選擇底下，一個男人梗係會揀一個錫自己嘅女人，所以佢揀Winnie唔出奇。」
提到林燕妮最初與霑叔在一起的時候，亦曾被指是介入霑叔與華娃婚姻之間的第三者，問到她可有感到歉疚時，林燕妮說：「冇咁嘅感覺，華娃喺加拿大，太遠啦，我覺得係佢哋兩公婆間嘅事，我冇破壞人嘅感覺。」至於與霑叔的一段情，林燕妮表示從未後悔，只覺對不起父母。
採訪：林妙萍
