日韓興啲乜：<br>搞鬼GimmeFive劈住酒睇自由摶擊

日韓興啲乜：
搞鬼GimmeFive劈住酒睇自由摶擊

三個女人一個墟，筆者與三數女性好友去到邊嘈到邊，吵耳飯局常惹周遭客人側目。今次到漢城GimmeFive，飯局時連串LiveShow同場上碟：LiveBand、人妖豔舞、FreestyleBreakdance加嘭嘭聲自由搏擊，全場人同你一齊吶喊助威，四周掌聲雷動洋溢興奮熾熱氣氛，姊妹們，我終於搵到個任嘈唔嬲嘅好地方喇！

記者：張銘恩　攝影：陳陶鈞

中產夜蒲點

GimmeFive位於江南區著名大型商場CoexMall地庫，因附近一帶是商業區，所以除吸引年輕人光顧外，店內還有不少剛下班的專業人士如律師、會計師、醫生等，他們經過一天緊張的工作後，很喜歡三五成群到此碰面聚頭，脫下西裝鬆開領帶一起吹水、隊啤、睇自由搏擊、聽歌，大家輕輕鬆鬆發洩一下。由於顧客對象針對中產上班族，所以餐廳逢星期日休息。

■入夜，GimmeFive門口霓虹燈勁搶眼。

■全部比賽打正旗號RealFight，現場收音真係聽到嘭嘭聲！

■入夜開始旺場，每晚均吸引很多附近工作的西裝友來湊熱鬧。

惹火人妖歌舞

睇完熱血沸騰肉搏鬥，跟住又有令人噴血的美豔人妖歌舞Show！「她們」大部份來自泰國及韓國，質素認真唔錯，最正係餐枱與表演場地近在咫尺，「美女們」近乎赤條條走到你面前載歌載舞，甚至扮WhitneyHouston、瑪麗蓮夢露搞笑一番，全場氣氛最高漲之際，「她們」會邀請幸運男士們上台一齊玩同拍照，豔福無邊。

■大跳草裙舞，兼扮鄧麗君唱《小城故事》，死未？

■搞笑版超紅孖膶腸WhitneyHouston，好騎呢惹笑。

■埋枱，觀眾即時攞手機影相，其實尾段亦設免費合照時間。

■幸運觀眾豔福無邊，又攬又錫滿面通紅，兩手忙於保護自己何B仔。

即場格鬥拳拳到肉

GimmeFive是間美式酒吧餐廳，有酒飲唔出奇，奇就奇在場內有個大擂台，大家可以邊飲酒邊睇自由搏擊比賽。比賽每晚三場，每場分三回合，現場有大投射螢幕及多部電視直播，包你睇到無走雞，初賽上月已開始，12月31日將會舉行終極冠軍賽，有心睇唔該快手訂位。

■一開始細粒紅褲人非常勇猛，快速將藍褲大隻佬逼往繩角，勁！

■再車身起腳直踢藍褲大隻佬頭顱，全場呼聲不絕，姿勢分滿分。

■藍褲大隻佬終於大發神威，一嘢右勾拳，把對手打到腰都攣埋。

■趁對手暈陀陀，再來一嘢重槌，打到正細粒紅褲人鼻子，K.O.！

同場玩意

GimmeFive果然是非一般餐廳，劈完酒睇完Show重有大把嘢玩，賭兩手得，打番鋪機又得，射電子飛鏢同打美式桌球都重得，總有一樣啱你玩。

■BlackJack，餐廳方面旨在娛樂，所以賭注最高限額$350。

■場內設有多部XBOX及PS2遊戲機俾你打餐飽。

套餐抵食夾大件

廳餐不收入場費，只要光顧食番餐就可以睇表演，食物則貫徹美式餐廳的大大碟風格！

■雜錦串燒餐，啤酒任飲，$320。

■韓式烤牛柳餐，隨餐還有沙律、餐湯、汽水、咖啡同生果盤，$350。

GimmeFive
地址：江南區三成洞159展貿中心B11A7（CoexMall內）
訂座電話：（82）2-3191526或（82）2-5513381
營業時間：6:00pm至2:00am（逢星期日休息）
網址：www.gimmefive.co.kr
註：以上港元價格只為約數，折算率為1,000韓圜＝7港元