事無大小射12碼都操心
求驗客手記：抵「白髮摩奴」做「車」神

車路士繼續贏波，奪標賠率又稍升溫到一點五倍，咁嘅強勢今個星期日硬碰阿仙奴倫敦打吡戰，真係引頸以待。睇番摩連奴個樣，「車仔」今日咁勁，真係付出唔少。
前晚睇電視直播見到摩連奴走出嚟吩咐要基斯文射十二碼，我求大俠發覺佢同今夏加盟車路士個樣，原來有咁大分別；球季都未進行到一半，由黑髮變白髮，蒼老咗唔少。又難怪，一邊要安排眾多球星嘅上陣次數唔好太少，又要面對老闆阿巴莫域治，真係少啲魄力都唔掂；滿頭白髮，證明佢壓力有幾大。其實，車路士家陣聯賽奪標賠率咁熱，顯示外界睇好佢哋，如果贏到聯賽冠軍，摩連奴滿頭白髮都值得嘅。

眾老餅出山掀懷舊潮38歲肯尼基亞跟「風」
阿根廷「風之子」肯尼基亞喺蘇格蘭豹隱後，最近有意復出，話有意投效阿根廷嘅聖羅倫素，參加南美自由盃，並無因為自己三十八歲「高齡」而言退。巴迪斯圖達加盟巴塞隆拿幾成事實，又傳比堤重投阿仙奴，肯尼基亞如果復出，世界球壇呢股「懷舊潮」唔知可以興幾耐。

破入球紀錄一語成讖查迪烏龍波真攞景
保頓後衞查迪對阿仙奴同車路士時，都喺比賽最後階段建奇功，幫球隊成功搶分。呢位突尼西亞球員日前聯賽對愛華頓，同樣又喺尾段入波，只不過今次「撻Q」射入自己大門。早排佢話只要入多一球，就破自己單季入波最多紀錄，勢估唔到呢一球係烏龍球。

千一分鐘不失球燕豪芬長益波友
荷蘭波受賭波客歡迎，因為強弱懸殊，好似榜首隊燕豪芬，喺上星期六炒主場嘅迪加史卓普四比○，破咗荷甲聯有三十一年歷史嘅連續不失球紀錄，創下一一一○分鐘不失球，而馬會雖然開到燕豪芬讓兩球，但「客勝」一樣得咗。難怪波友話長追荷蘭強隊，總會連本帶利贏番。

搞黃業累老婆受辱拉夫舒密加即縮沙
早排被傳媒踢爆會投資色情事業嘅F1車手拉夫舒密加，經過日前德國電視台攞佢同佢老婆嘲笑醜化一番之後，如當頭棒喝立即回心轉意，話會撤銷投資唔玩，重話理由係深明形象比金錢重要喎；睇怕佢知道損毀形象之後會嚇走其他贊助商，因小失大就真，都算識執生啦！
逢周一至周五見報