上周五美股無戰事，指數變化輕微。恒指創新高後，料暫時反覆，資金流向落後股份。上周五中銀（2388）異動，就係因為中銀距52周高位有唔細水位。
中信C輪4483：同中銀一樣，中信泰富（267）現價22.55元，距52周高位24.45元唔少，上周五升0.15元，逆市向上，想郁。過去1周，紐約油價大散6.9美元，幅度14%，對航空股有利。中信係國泰（293）與港龍第2大股東，得益不在話下。
中信C輪揀對象埋手，絕對容易，得隻4483有得諗。其他3件，唔係特種輪就係成交一片空白，唔使諗。4483輪價29仙，明年10月到期，溢價5.5%，槓桿率7.8倍（有效4.8倍），引伸波幅31.1%。正股如果升返上52周高位，揸4483可以執45%，見0.42元。
太AC輪4506：太A（019）亦有航空業務質地，不過地產質地較中信泰富勁，所以跑贏中信泰富好多。恒指𠵱家企喺年頭高位，太A股價63.75元，則高過年頭高位57.25元達11%。年底芬佬有可能做windowdressing，托高太A。吼住未來幾日，見太A有回吐之時，低價執C輪。
吼低位執貨嘅對象係4506，明年3月到期，輪價84仙，溢價2.6%，槓桿率7.6倍（有效5.9倍），引伸波幅30%。回落至80仙以下買貨，最好能夠喺75仙上車。
中電信C輪4499：中電信（728）近日上得急啲，上周五收2.95元，若見回落至2.85元，買C輪，對象係4499。明年6月到期，輪價55仙，負溢價0.7%，槓桿率5.4倍（有效4.8倍），引伸波幅22%。
章盛