相機品牌有好多，不過算得上名牌嘅唔多，講到具質素保證更係屈指可數。CONTAX同CarlZeiss兩個名字都係相機界嘅真正名牌，前者在生產相機向有經驗，而後者更可以話係靚鏡嘅代名詞，於CONTAX新推出嘅兩款相機中，既切合一般玩家要嘅易拍要求，同時一齊用上CarlZeissT*鏡頭，靚機靚鏡同時兼得。
記者：許福合 攝影：周旭文 ImageGirl：Winnie
PROFILE
感光元件：400萬像素CCD
鏡頭：蔡司T*定焦鏡
屏幕：1.5吋
記憶：SD/MMC卡
電源：專用鋰電
體積：94×38.5×21mm
重量：90g
兩部新機中，外形較為有睇頭嘅要數i4R，體積輕巧，重量只有90g，加埋個鋁金屬外殼，「令」面機身，唔講你知重以為係火機仔，好鬼型！筆者測試時只有銀色機，另外還可有黑色同紅色，可惜代理還未有貨返。雖然銀色機已夠靚仔，不過紅色機筆者就更為期待，嚟緊聖誕節送畀女友簡直一流，各位男士們值得留意。
鏡頭設計亦相當創新，官方稱為「隱沒式」設計，使用時需將連閃燈在內嘅「鏡頭蓋」拉出，鏡頭即會伸出。好處係既可保護鏡頭，同時又可防止LCD被刮花。
■黑同紅色版要遲啲先返到行貨。
蔡司T*靚鏡
i4R其實於早前德國舉行嘅2004Photokina現過真身，外形夠搶外，採用「蔡司」TessarT*鏡頭亦係焦點之一，屬於定焦鏡頭，最大光圈為f2.8，有3組鏡片，並用上非球面鏡片，質素有保證之餘，可減少變形情況出現。此機還設有自家嘅R-TUNE技術，主要提高相片處理速度，i4R可以連環快拍每秒3張相片，媲美一般Prosumer級相機！功能方面以自動拍攝為主，所以主要針對喜愛一按即拍嘅用家，設有8個預設拍攝及5個白平衡模式，另外還附有拍片功能。i4R外形實在花上唔少心思，可惜DC賣點之一嘅LCD，只有1.5吋，雖然畫面質素尚算不俗，但今時今日顯然唔夠大。
同場加映
U4R扭機換新裝
U4R同之前Kyocera幾部相機外形好相似，更鋪有一層皮面，聞落重有一股皮革味，都幾過癮。配有扭擰鏡頭設計，方便拍攝不同角度，解像度為400萬像素，與i4R同樣用上T*鏡頭，相片質素唔使擔心，而光學變焦就有3倍。背面嘅2吋芒影相睇相都幾正。具備9點區域對焦，影相特別方便，而拍攝模式亦夠多，可應付多種不同環境拍攝。
捷訊科技
查詢電話：21519299
