「我好驚,覺得自己好危險」<br>馮仁昭四圍超:珍妹俾馬太追蹤嚇親

「我好驚,覺得自己好危險」
馮仁昭四圍超:珍妹俾馬太追蹤嚇親

李麗珍前晚喺台中為金馬獎擔任頒獎嘉賓,點知離開會場返到酒店時,馬太李靜婷突然間殺出兼攞本《珍人真事》喺佢面前揮舞,珍妹即時扮睇唔到走咗去。噚日珍妹喺台灣返到香港機場,一改之前不回應嘅態度,直言俾馬太嚇親,佢話:「我好驚,估佢唔到。」
珍妹憶述當佢返到酒店時,馬太突然咁躡出嚟,嚇咗佢一跳。珍妹話今日會見律師,問吓意見應該點做,珍妹話:「唔知佢嚟台灣做乜,我寧願狗仔隊日日喺我屋企等我,好似保護我咁,佢𠵱家影響埋我工作,我覺得自己好危險,我住邊同去邊佢都知,我人身安全受威脅,本來我諗住單嘢唔回應,點知搞到咁,唔回都唔得。」

驚到瞓唔着
珍妹話前晚驚到瞓唔着,助手落街買嘢都吩咐佢唔可以立亂開門,怕馬太會上門搵佢麻煩,珍妹話:「連律師都話估唔到佢咁瘋狂。」據馮仁昭查探,今次馬太過台灣話傾新書出版嘅事,但其實係香港一本雜誌出錢請佢過去嘅。

朱茵聖誕撇甩男友
朱茵噚日以一身背心短裙,去到銅鑼灣世貿中心為「愛心熊慈善義賣」擔任表演嘉賓,佢話由於Beyond下個月舉行演唱會,男友黃貫中喺聖誕節時要加緊為演唱會綵排練歌,加上朱茵自己都有工作在身,所以今年聖誕節,佢哋兩個唔可以一齊溫馨度過,朱茵覺得好可惜!

周渝民得罪韓國女性
上個月尾F4三子周渝民(仔仔)、吳建豪、朱孝天,同黎明、濱崎步等亞洲歌手,喺漢城參加第一屆亞洲音樂交流演唱會「AsiaSongFestivalConcert」。第一次去南韓嘅仔仔,早排返台灣同啲報章講,話覺得每個南韓女性都生得一模一樣,呢句說話引起韓國網民好大迴響同不滿。佢哋認為仔仔都係黃種人,冇理由咁樣話韓國女人!

關心妍拍MV撞邪
關心妍(Jade)噚日去九龍公園出席活動時一臉倦容,原來阿Jade懷疑自己撞鬼,重搞到要入急症室打針㖭。
阿Jade話前日去咗一幢舊樓拍MV,點知返到屋企就覺得個肚抽筋、又暈又嘔,最奇怪係醫生都唔知佢有乜嘢病。最後阿Jade話祈完禱後就冇晒事,所以佢覺得應該係拍MV時「中招」。

方力申急電媽咪救命
方力申(Alex)噚日去尖沙嘴出席「防火運動開幕禮」,佢話前日滑完水之後冷親,搞到患咗感冒,食完中藥後重嘔咗兩次。由於Alex間屋有成二千幾呎咁大,加上佢感冒失聲,所以嗰晚佢想叫阿媽入廁所扶佢都叫唔到,最後惟有打手提電話叫媽咪入去扶佢,經過呢件事後佢覺得阿媽真係好偉大!

蔡依林30秒閃電換衫
蔡依林(Jolin)前晚喺北京舉行演唱會,除咗以一貫勁歌熱舞獲得觀眾如雷掌聲外,最特別係表演三十秒快速換裝術,幾次換衫都以三十秒極速完成。今次Jolin請嚟F4嘅吳建豪擔任嘉賓,重大讚對方係心目中嘅白馬王子,搞到觀眾咿嘩鬼叫。Jolin喺台上俾幾個男舞蹈員抬起,佢話舞蹈員攬得佢太實,搞到耳機出現問題喎!

馬太李靜婷前晚突然追到台灣,攞住本性書搵李麗珍,嚇到珍妹急急腳走人。

朱茵

周渝民(右)

關心妍

方力申

蔡依林