日本潮男怨女時裝名牌UC來港搞畫展，作品魑魅魍魎，畫價動輒四、五萬一幅，有啲更高達二、三十萬，但銷情唔錯。其中有買家係對30出頭嘅年輕夫婦，一生人第一次睇畫展，已豪氣買下一、兩幅名品，唔知係咪呢代啲人藝術水平高咗喇？
潮界經紀大隻標對此有精闢嘅睇法：「搞潮流生意最講食橋，我發現𠵱家班客人唔止外表要裝身，連心智都要升級，所以搵啲藝術橋包裝就冇衰！其實創作呢家嘢好空泛，即係科技股隨時可以變身成澳門概念股，你敢講就有人感興趣。想條橋賣得最好係用王晶嘅內容加上王家衞嘅包裝；假如班客欣賞能力未夠高，不過消費能力夠強，王晶嘅內容絕唔怕悶親佢哋，而王家衞式嘅包裝就令佢哋覺得高人一等。」
佢話：「我最近有個客，三十歲仔，繼承老竇間舖賣豬膶麵，賣出過千萬身家，但每日返工就只對住血淋淋嘅豬內臟，所以每日放工就要盡情補償。出旺角買幾千蚊嘢，由街頭時裝以至潮流玩具佢都追，亦愛發表個人潮流見解，實行用財力買番尊嚴！𠵱家潮流舖有生意做全靠呢班草根富豪，佢哋可算係潮流界嘅『自由行』！」
主持人：大食Jack
八卦熱報：[email protected]