韓頒獎禮BoARain少年得志
神話掃三獎揚威四海

前日喺漢城慶熙大學平和殿堂，舉行咗「2004m.netKmtvMusicVideoFestival」頒獎典禮，當地人氣青春偶像BoA同Rain，分別攞咗「最優秀歌曲大獎」同「最受歡迎音樂錄影帶獎」，大出風頭，而嚟自日本嘅過江龍Gackt，亦獲得「最佳亞洲搖滾歌手大獎」，人氣已遍及韓國。

換多套戰衣
BoA前日憑歌曲《MyName》奪得「最優秀歌曲大獎」，佢嘅打扮愈見成熟，當晚以多套服裝亮相，喺台上載歌載舞，狀態十足。而憑《It'sraining》MV攞咗「最受歡迎音樂錄影帶獎」嘅Rain亦不甘示弱，佢亦喺台上施展渾身解數，令在場女fans尖呼狂叫。
不過，當晚嘅大贏家，依然係人氣韓國男子組合神話，佢哋囊括咗「最佳男組合」、「最佳跳舞藝人」同「最受外國觀眾歡迎」三個大獎。
而人氣直迫神話嘅少男組東方神起，就攞到「最佳新人組合」。至於有「韓國情歌天王」之稱嘅申昇勳，就得「最佳情歌獎」。

過江龍發威
由於韓國近年已經正式開放日本音樂市場，所以前日個頒獎禮上，日本妖男Gackt就奪得「最佳亞洲搖滾藝人大獎」，另一隊日本HipHop組合m-flo，就勇奪「最佳亞洲HipHop藝人大獎」，而聽聞頒獎禮當日F4嘅言承旭都有到場。