遠東發展（035）連續調整兩個禮拜，呢個禮拜，係時候撈底。遠展同國際賭業巨擘威尼斯人，合作發展濠江大型酒店業務，免地價獲總樓面240萬平方呎土儲發展，即係話，愈係多大孖沙話進駐濠江，對澳門土儲需求愈大，遠展呢幅免本地皮潛在升值及巨利愈大。
連地價免本及升值因素，每平方呎為遠展升值區區1000蚊計，已經坐享高達24億元龐大資產升值或巨利機會。所以，買遠展，唔止買澳門概念，重係buy管理層精明眼光。再講，遠展10月以1.4億元出售佐敦帝豪花園酒店，每房作價140萬元。7月份時，以1.18億元購入中上環荷李活道德和中心，將改建成150客房酒店，連改建每間房成本不過98萬元，一來一回，唔止賺差價，重賺埋「地區」質素。做生意好似買股票，一樣希望做到高沽低揸，見微知著，遠展會繼續跑出。技術位睇，遠展50日線喺2.52元，見有調整，去到呢個位，要買。
新世界（017）上月創出52周高位9.25元後一路調整，如果呢個禮拜再有調整，亦係要趁手。第一，新世界03年及04年度連續兩年出血，先後為本身地產物業、新中（917）及新信息（301）作大額撥備，業績見紅，但已經撥得好乾淨，本年度有望止血見增長。第二，新世界家底厚，家陣每股資產值15.7元，折讓46%。大牛市，除咗買當炒概念股，炒資產折讓股一樣吸引，一個唔覺意，追到上資產值水平，新世界潛在升幅講緊86%。
錢雋