關於船王董浩雲事迹嘅︱︱《董浩雲的世界》由中文大學出版，舉行新書發佈會，十一月三十日喺交易廣場舉行，左丁山掹衫尾出席發佈會，睇吓歷史圖片展覽，好彩去得快啫，未夠六點，已經人山人海，逼到行都行唔郁。既然係船王董浩雲著作出版，董建華、董太、董建成、金董建平等自然喺晒度，有董生家人在，場面點會唔熱鬧吖。
左丁山對船王事迹，略有所聞，亦好敬佩。想當年，一位亦師亦友嘅前輩舞王張走返學校旁聽，左丁山當時少不更事，問佢年紀咁大，走返學校做乜？舞王張話：「習慣番上堂先，沾染吓學術氣氛，等船王隻海上學府伊利沙伯皇后號裝修完畢，我就放開工作兩年，上船參加課程，環遊世界，一償心願。」一年後，舞王張興高采烈，預備申請入讀海上學府之際，伊利沙伯皇后號失火焚毀，舞王張失望到不得了，唔再到學校旁聽，此事左丁山永遠唔會忘記。
酒會有關船王，航運界人士當然出席。已退隱幕後嘅船務D剛自美國回來，同左丁山講：「洛杉磯海港外，貨輪大排長龍，巴西往中國運費，升咗近四倍，中國國企狂買礦山資源，運鐵運銅返中國。我入行三十幾年，未見過航運有今日咁好賺嘅，一條七千萬美元造價嘅貨輪，一年可以翻本，賺到癲咗。」
我哋冇資格經營貨船，知道又如何呢？船務D話：「買三一六啦，應該重有得升。」吓！三一六就係「東方海外」，已經升到成三十蚊咯喎，兩蚊嗰陣話畀我聽就發達啦，𠵱家重買？會唔會追寶尾呀！船務D大聲話：「唔使驚，起碼重有一年玩，驚就一齊！」唔，都係十五十六，問過經紀K先。