馬會主席夏佳理呢日唔講馬，改行講芝士？喺三百個中學生面前，Ronald親身推介心目中嘅好書《誰搬走了我的乳酪？》（WhoMovedMyCheese？）其中一位學生聽完佢一輪讀書心得後，問咗一個好刁鑽嘅問題：「呢本書有乜可以改善嘅地方？」
夏佳理呆咗一陣，估唔到家陣啲細路咁厲害，竟然挑戰名著。諗咗一陣，夏佳理話本書改做《為何搬走了我的乳酪？》（WhyMovedMyCheese？）更好，呢個問題正好係書中其中一隻老鼠問嘅問題。
然後主持座談會嘅教育城行政總裁鄭銘鳳問佢點解離開立法會，夏佳理就語重心長咁答：「因為嚿芝士好大件，我郁唔到。」一九九九年，立法會就政府唔起訴胡仙事件對梁愛詩提出不信任動議，結果夏佳理所屬嘅自由黨唔支持，令動議被否決，意興闌珊嘅Ronald第二年就唔再角逐連任議員嘞。
（圖）夏佳理（右）同中學生大談芝士經，唔知有幾多同學明白佢當年離開立法會嘅無奈與哀愁。
傳真︰2623-9278
電郵︰