「人生有個真正朋友，的確好極！」何況古巨基有三位紅顏知己？基仔即使與傅明憲、周慧敏和莫文蔚老友鬼鬼，卻不曾跟她們傳緋聞。既然身邊有這麼多紅顏，基仔為何不追求她們呢？基仔堅定地說：「做朋友嘅係一生一世，永遠都唔會改變！」
古巨基入行十年多，有關他的新聞大多圍繞事業。愛情呢？只是不定期地被追問他跟助手是否情侶關係。這些年來，基仔總有方法把這個話題帶到別處，但圈中有三個女人，卻與他有着微妙關係。
「點解同GiGi（傅明憲）friend？因為佢靚女囉！大家係拍無綫劇集時識，佢當時係電視台花旦，合作過兩套劇，我哋未埋位，就會傾偈打發時間，識得耐咗，知佢個人好有愛心，好似佢屋企養狗，啲狗重做埋狗醫生，我覺得佢確實係一個好人。
「我同佢係可以互訴心事嗰種。記得以前買咗一對鞋，但就冇放入衣櫃，點知事隔半年，我打開個鞋盒，發現有半個蘋果喺入面，個蘋果已經爛晒，原來係GiGi食到一半掉咗入去，真係俾佢激死！
「早排GiGi講番當年拍《皇家反千組》，佢話未埋位時見到我自己一個人喺服裝間偷偷哋喊。當時係我工作低潮期，本來開始咗做歌手，但因為合約問題，調返去拍劇。好記得嗰時一唔開心，佢就安慰我。大家可以將心底嘅私事同人分享，呢啲就係友情喇！」
「至於周慧敏（Vivian）係拍《包青天》時識，我哋成日都要出埠拍外景，喺陌生嘅地方，自然就多份親切感。後尾發現大家都鍾意打美式桌球，就咁篤出感情。但我最欣賞佢追求自己喜愛嘅生活，瀟灑咁行自己揀嘅路。佢外表柔弱，但內心好堅強。我又好欣賞佢識畫畫，畫畫嘅人一定係好人，哈哈。
「Vivian對我嘅事好熱心，佢經常都會問我工作成點。其實公司曾經有人提議過，叫我問Vivian可唔可以合唱《愛與誠》，但我唔使開口都知個答案，佢同倪震有次同我講，話好鍾意呢首歌，之後我先試吓問，點知佢為咗幫我一口答應，我真係好多謝佢。」
「我同莫文蔚（Karen）合作為動畫《大力士》配音，當時同佢唔熟㗎。後尾大家合作拍《熱血最強》，就傾多咗偈，交換埋電話，佢好記住啲朋友，得閒會打嚟問候吓。我個人較被動，通常都係朋友搵我，不過識咗佢之後，我就俾佢感染，𠵱家得閒都會搵吓朋友。」
基仔覺得，在這個圈不難結交朋友，但要經歲月孕育，他說：「我交朋友要用長時間去睇，能夠互訴心事嘅，咁至算真正朋友。有人問我，既然我覺得佢哋三個咁靚，心地又咁好，點解冇諗過成為情侶？一定要拍拖咩？我冇懷疑過大家嘅友情，大家唔係對方杯茶就唔係，有啲嘢講緣份。做朋友嘅係一生一世，永遠都唔會改變，𠵱家開心已經夠。」
