煲碟王：UltimateMatrixCollection
一套十碟聖誕煲碟王

《無間道》BoxSet出唔切、《魔戒》終極BoxSet又未有聲氣，估唔到失驚無神走咗套《Matrix》珍藏版出嚟迎聖誕。三部曲《Matrix》再加隻動畫版《Animatrix》4隻碟，華納居然可以將製作特輯炒多6隻DVD，一套十碟全程超過40小時，就算每晚睇兩個鐘，都要睇到聖誕節，Fans今勻夠晒皮喇啩？

記者：徐影龍

香港譯做《22世紀殺人網絡》，認真長氣兼膚淺，難怪全港觀眾開口埋口都叫《Matrix》。今次登陸香港嘅3區DVDBoxSet，名為UltimateMatrixCollection，雖然包裝上只算一般，5個盒裝住10隻碟，外加一個硬紙盒，不過倒也名副其實，收錄內容夠晒終極。除可重溫各有特色嘅三部曲及動畫版外，重新加靈魂人物華卓斯基兄弟嘅兩段訪問，補充一下劇情嘅細微位，對《Matrix》世界觀了解更多。10碟版旺角街價賣緊約$580，除番開都係幾十蚊一隻DVD，Fans無理由走得甩啫。

美版包裝有心思

坦白講句，叫得終極珍藏版BoxSet，港版無疑求其咗啲。唔好話三部曲全部要Remaster過，又或補充Niobe同Ghost嘅劇情，但起碼加番dts靚聲畀我吖，硬皮紙盒又超簡單，燙金激凸完全欠奉，一味以量取勝，叫資料大全重嚟得貼切，睇怕遲啲會再出「超級終極珍藏版」。歐美就好啲，另有「限量」終極珍藏版推出，靚靚透明盒裝晒10隻碟、附送Neo半身Figure同80頁書仔，賣90.91美金，有興趣者大可上亞馬遜度訂。

畫面重新處理

未講10碟裝內容點樣豐富前，先講吓潮流好興嘅畫面修復。由於首部曲《Matrix》攝於1999年，數碼特技點都唔夠𠵱家咁勁，用30部柯達DC260拍攝360度全方位慢鏡，已經叫好高科技！所以終極珍藏版將首部曲重新Remaster過，色彩調校得更為自然，令到畫面上一啲暗位及微細位，得以重見天日。筆者就Cap咗修復前後嘅畫面，俾大家參考一下。

內容豐富得驚人

三部曲翻睇過無數次，終極珍藏版最吸引都係嗰6隻BonusDisc，全長超過35小時，重耐過睇全套加長版《魔戒》。頭三隻分別係三部曲推出前嘅製作特輯，照例有核心人物訪問、特技解構等內容，電視全部播過晒，點都唔夠後尾3隻碟嘅《TheMatrixExperience》咁吸引。第一隻碟用咗一個鐘頭，以哲學角度分析《Matrix》世界，再用一個鐘講戲內科技嘅可行性，總之將套戲昇華至極高深嘅層次，大學生寫論文實搵到靈感。
第二隻碟開始入正題，將三部曲拍攝時間表呈現，幾時搭條高速公路、幾時掃描主角嘅立體影像等，睇完真係唔到你唔服華卓斯基兄弟嘅魄力，難度咁高重夠膽2、3集一齊拍。最後一隻為多媒體DVD，除收錄兩首主題MV外，最正係有大量分鏡手稿同設定相集，啲水彩Artwork真係好鬼靚，當SlideShow睇都得。

華納影視
查詢電話：31281791

必睇經典場面

慢鏡避子彈《Matrix》

首部曲喺99年面世，雖然戲內有太多可列入經典嘅場面，不過論最為人津津樂道嘅，始終係慢鏡避子彈一幕，幾年內不論大片或笑片，都以此為抄襲對象。

百人大混戰《MatrixReloaded》

相隔4年，特技幾何級跳升，100個AgentSmith圍毆Neo，淨係度位、Key大頭都做到氣咳，雖然出嚟效果幾假，不過膽識及誠意絕對值得嘉許。

死守錫安《MatrixRevolutions》

今集以交代故事為主，動作場面唔算多，不過裝甲兵誓死捍衞錫安、力拼幾十萬鐵甲八爪魚大軍一幕，睇到熱血沸騰，比結尾「悟空鬥布歐」精采得多。

CG幾可亂真《Animatrix》

集9個動畫短篇於一碟，因為無喺戲院上映過，相信睇過嘅多數係Fans，最經典自然係SQUARE製作嘅《FinalFlightofTheOsiris》，一幕「黑人靚女互片」幾可亂真，難得連打鬥都好自然，重愈片愈少衫口忝。