愛看書的香港人不多，更別說冷門本地旅遊書，但梁榮亨卻寧捨棄正職，也要自資開出版社推廣本地旅遊。明眼人斷言一定蝕本收場，這個行山狂迷亦坦言：「明知條路係窄，自己都預咗蝕。」若非滿腹理想和熱誠在苦撐，相信誰也不願不斷遠足來幫補自己出版的蝕本書。
記者：尹珊珊攝影：周旭文
（被訪者提供部份圖片）
換回自由做全職旅遊人
梁榮亨皮膚黝黑，年過半百其實不覺老態，他卻謙稱：「人老嘞，膝頭軟骨組織長期勞損，𠵱家行耐啲都覺得痛，不過都抵喇，話晒都行咗三十幾年。」他小時家貧，16歲輟學做五金學徒，某日閱報見一則行山隊通訊，好奇隨隊往八仙嶺遠足：「第一次發現原來香港地方咁靚，之後就狂跟行山隊旅行。」兩年後，他轉行在船廠做燒焊工人，間中會為興趣替一些團體搞活動，由跟隊到帶隊，挑戰性大大提高：「搞活動先知道原來做搞手唔容易，搞搞吓發現自己有呢方面嘅天份，可以滿足領導慾。」
80年代中期，梁榮亨在巴士公司擔當維修技工，收入穩定卻失去自由。「一家五口收入唔高，根本唔夠養妻活兒，我咪開始兼職做行山領隊囉，諗住賺少少外快幫補家計。」那時傳媒已封他做行山專家，有一定知名度，公司卻揶揄他不該兼職，最終被迫轉行當地盤散工，過「有自由，但搵唔到食」的日子，直至97年，一場金融風暴，連散工也做不成，索性做全職旅遊人，同年10月，他向高難度挑戰──自資開設出版社。
小檔案
梁榮亨，53歲，旅遊30多年，81年創立友峰旅行隊，88年開始於報刊撰寫旅遊文稿，95年出版首本著作《香港奇景探勝遊》，97年成立友晟出版社當總社長，現為友晟之友旅行隊總領隊、友峰會創會會長及中國香港旅行遠足聯會學術顧問。
鐵鑄雙腿走遍青山碧海
他鐵鑄雙腿行遍香港奇山異水，甚麼南果洲三叉洞、高崗吊燈籠、糧船灣奇岩、梧桐寨石澗、屏嘉壺穴，他統統到過，並在88年開始於《商報》、《文匯報》撰寫旅遊文稿，儲存了大量稿件，95年萬里出版社曾為他集結成書：「第一本書《香港奇景探勝遊》用黑白印刷，出版社話書種窄，好難出彩色喎，佢唔夠膽做，我惟有自己做。」向親朋戚友左借右借，再加好友集資，97年終成立友晟出版社。由行山迷到出版社社長，其艱辛卻不足為外人道，他不懂控制成本，後期製作要靠朋友介紹，處處碰壁：「開頭市場定位唔夠清晰，邊做邊摸索，𠵱家製作會要求版面多變化，要跟潮流、要有新意。」
昔日一班支持他的戰友，在金融風暴後已自身難保，出版社遂在上年開始採用股份制籌集資金：「一本書賣幾多，投資人就分幾多，但講真，肯出資嘅朋友都係支持多過真係當做投資。」迄今，出版社已推出五本旅遊書及兩本攝影集，日後亦打算以新角度繼續推出新作。「𠵱家出書唔可以齋輯錄報紙原稿，要加強歷史同掌故部份，所以花多咗時間引證，始終係白紙黑字，有謬誤就唔好啦！」他讀書不多，但自小愛閱讀武俠小說，並經常拜讀朱維德、陳溢晃、吳灞陵等前輩著作，為求著作完善，更苦練攝影：「以前行山頂多影張『到此一遊』相，𠵱家就會為影相而行山，每次都帶齊影相裝備。」
出旅遊書快樂唯一收穫
搞出版，快樂是唯一收穫，他笑道：「一次頂多咪帶二三十人行山，但透過書中文字同圖片，就可以培養更多人對郊遊產生興趣。」現時他全副精神也放在寫作上，但在周日仍帶隊出征，賺錢養這個蝕本貨。「喺香港搞行山唔好諗住賺大錢，免費旅行隊已經有大把，出版社租金水電都係錢，所以要出奇制勝，專攻路途較偏遠嘅水線，唔一定賺，但起碼一般旅行隊少搞。」猶幸他與傳媒關係良好，在宣傳上也幫了一把。
他愛山愛水也愛家，結婚二十多年的太太從沒怨言，他笑說：「結婚前我講明，婚後會繼續，發達就更加唔使諗。」幸好妻子是參加草藥針灸興趣班認識的同學，彼此志趣相投。梁榮亨育有兩子，大兒子剛投身社會，小兒子仍在大學就讀：「佢哋細個都有跟我行山，但呢代的細路有大把娛樂，一時野外定向，一時玩攀石，有正統訓練，拎埋拎埋好多沙紙，我都叫佢玩還玩，千祈唔好影響學業。」
遠足遇賊不敢獨自闖山
說到近年不少行山意外，他即時想起兩年前的難忘經歷：「有次一個人去南北刀刃，半路遇到三個非法入境者，佢哋問我攞嘢食，我話後面重有成班朋友嚟緊，好彩大得走佢哋，自此我唔敢一個人去行山。」還有一次叫他最刻骨鉻心：「嗰次帶團去青水灣半島睇坐佛岩，有個玩開攀石嘅團友趁我影相唔為意，爬上一塊有四五層樓高嘅大石，當我擰番轉頭，佢已經失足。」目睹意外發生，梁榮亨直言嚇呆：「親眼睇住佢跌落地，真係心都離埋，好彩佢落地識用手撐住，重有意識，跌後少少個頭撞落石，分分鐘連命都無。」最後，他提醒讀者：「行山要提高警覺，咁至可以減少意外。」
