李克勤前晚以一哥身份，聯同一大班師弟妹好似陳文媛（BoBo）、董敏莉、黃伊汶等去尖沙嘴出席佢哋環球唱片公司舉行嘅聖誕派對，問克勤係咪會同劉德華一齊攞無綫嘅「最受歡迎男歌手」獎，克勤笑話：「邊有咁簡單？有咁簡單就好，如果華仔攞都戥佢開心。」
記者話華仔講過如果自己攞咗最受歡迎男歌手，亞太區男歌手就唔知會唔會畀佢，克勤笑話：「佢都可以攞埋亞太嘅，冇明文規定話唔可以攞亞太又攞最受歡迎男歌手嘅。」
對於日前自己同華仔兩個人幫無綫嘅《娛樂大搜查》做訪問，克勤話：「邊有咁簡單，做個訪問就有獎攞？不過我哋做咗個過癮訪問，由華仔幫我占卜睇我有冇機會攞獎，結果係點？我梗係唔講得啦，但將我同華仔相提並論都好開心，我同佢一直有距離，總之如果輸畀佢我好心服口服，同埋係一件光榮事。」
女生宿舍喺聽日要去華南出席新碟發布會，而Toby嘅緋聞男友蕭正楠都會出席撐場，之前Toby嘅爹哋梁家樹話唔想個女做娛樂圈，亦唔想佢同圈中人拍拖，Toby話：「爹哋初時話唔想我入行，但係之後都叫我試吓，佢話只要我開心就得喎。」
曾華倩噚日喺港台為廣播劇錄音時，講到近日有關霑叔嘅新聞，佢話以前同霑叔食飯都有見過佢同太太Winnie，覺佢兩公婆好恩愛，大家都好錫對方，所以淨係呢一點都已經代表晒一切，其他人唔需要再講任何嘢，而且霑叔重會成日喺大家面前大讚Winnie嘅優點。
董敏莉（Monie）日前去咗中文大學接受訪問，喺訪問時重提自己嘅戀愛經驗，Monie話中三初戀分手係因為男朋友留班而同對方分手，之後有一次去英國參加遊學團就同一個意大利人擦出異地情緣，雖然當時大家只係會去公園，但嗰種感覺已經好sweet，令佢好回味。
