相比愛情和友情，古巨基在事業上的起伏較大，基仔自九四年加入樂壇後，成績頗理想。及後遇上沉寂期，曾放棄香港市場，花了兩年時間在內地接拍瓊瑤的電視劇。直至遇上現在的經理人黃柏高（Paco），他才重出樂壇，歌曲排山倒海推出，《傷追人》和《愛與誠》等均十分流行。
臨近年尾，問基仔對於樂壇頒獎禮得大獎的信心，基仔說：「我自己努力咗一百分，我同公司對今年嘅唱片銷量同歌曲成績都好滿意，好幸運我遇到好多好歌，但獎項始終要靠天時地利人和，我會平常心去睇。」
基仔重返樂壇後的心情，到現時仍記憶猶新，他說：「過咗去我先同你講，最初返嚟時，好多記者會問我心情點，次次我都係故作鎮定答『唔驚』。其實心嗰句，梗係有壓力啦。就算再過多一年，我仍然係好擔心，猛喺度諗要花幾多時間補番走咗嗰兩年嘅嘢。
「嗰段走咗嘅時間，唔可以話係失地，只可以話係凍結期，就好似一個飯盒收埋喺雪櫃一段時間，之後開飯時間，咪將個飯盒放喺微波爐叮番熱囉。Paco就係嗰個微波爐，我就係個飯盒。」
對於再闖樂壇，還獲樂壇前輩譚詠麟讚賞，躋身「新四大天王」之列，對於現時的成績，基仔沒有飄飄然，他說：「都係一樣啦，聽到呢個稱號我會好開心，但開心一日之後，我記得仍然要努力。有個稱號唔等於成功，亦唔可以話係收成，我重有好多嘢要進步。」
採訪：王連連
攝影：仇志德
服裝：I.T.
髮型：SamuelCheung@Hair
場地提供：Bullmania