林峯、佘詩曼和鄭嘉穎昨日在北角糖水道街市拍攝新劇《YummyYummy》，劇情講述經營麵檔的小販鄭嘉穎，經常得佘詩曼及林峯幫助，昨日更助他「走鬼」。其間，幾十位師奶、菲傭及小朋友圍觀拍攝，不過阿佘拍畢後匆匆離開，只有林峯及鄭嘉穎與街坊閒聊，二人看來頗受歡迎，林峯吸引小朋友fans，鄭嘉穎則甚得婆婆及菲傭歡心。
林峯被大班小朋友圍着要求合照，他更以福建話與他們談話。林峯說：「我係福建人，以前讀北角蘇浙公學，所以北角係我中學蒲點，我工作後好幾年都冇嚟，𠵱家返嚟好有親切感。」
鄭嘉穎則頗受菲傭歡迎，一名婆婆更搶着要與他影相，更輕撫鄭嘉穎面頰，並大叫：「我好鍾意你㗎！」鄭嘉穎和婆婆合照後說：「唔可以話抽水，可能觀眾睇電視識我，我覺得個婆婆幾可愛，唔算博懵。我同屋企嘅老人家都係咁，見到佢哋就話埋嚟錫啖先，當佢哋細路仔咁。」
採訪、攝影：卓寶花
