力爭金馬影帝的劉德華前晚抵達台中後，即與工作人員到「鼎王麻辣火鍋」用餐，其間他不停指手畫腳，又做出各種趣怪表情，心情勁靚。昨日他則在下榻酒店房間為國語新專輯開會，到傍晚才趕到金馬獎會場出席盛會。
華仔起程赴台前曾接受港台《各領風騷》訪問，大談對建立家庭的見解，他說：「家庭係一個好自然嘅過程，我覺得我係需要嘅。」被問到為何對感情事保密，華仔說：「我覺得工作就係工作，我嘅私人生活同感情生活，講聲『大家明啦』就夠。」
近年多位華仔恩師好友去世，加上其父曾患膀胱癌，令他對生死無常有另一番看法，他說：「我爸爸十個月前患膀胱cancer，但係已經做晒手術，冇問題。」他續說：「冇人會覺得自己今日係最後一日，我自己冇預備，我接受咗任何一個時候都有機會離開，所以對自己好啲。」