特首夫人董太噚日着靚靚出席「二○○四年義工嘉許典禮」，估唔到董太唔單止自創口號出色，賣口乖亦都有一手。佢喺致辭時率先讚班長者義工個個容光煥發，神釆飛揚，然後就猛話自己雖然做咗好多年義工，但係都唔見得好靚，重埋怨啲報紙影到佢好肥，佢呢招自嘲果然𠱁到班長者笑到見牙唔見眼。但係八方即刻心諗，睇嚟以後喺揀董太啲相嗰陣，真係要落多啲眼力先得嘞……
其實有冇外在美唔緊要，一個人最重要係心地善良，董太做咗三十幾年義工，唔使講都知佢充滿內在美，佢噚日就爆肚講咗幾段做義工嘅經驗。董太同八方講，佢喺七十年代初期做義工時，成日同班公公婆婆打番幾圈，培養感情，注碼就係花生糖，佢重話𠵱家之所以喺麻雀枱上成日做到大贏家，都係拜當年苦練所賜。
董太打牌叻可能冇乜人知，但係佢鍾意煲老火湯畀老董飲就相信人人皆知，董太話自己當年就成日煲湯畀班麻瘋病人飲，重自爆話𠵱家屋企用緊嗰個煲，就係當年煲湯畀麻瘋病人飲嗰個，真係估唔董太連對個煲都咁長情。
（圖）董太呻啲報紙攝影大佬影得佢好肥，各位讀者自己評評理嘞。
傳真︰2623-9278
電郵︰