昨日中午，二三線股曾出現恐慌性拋售，皆因有相同炒家的上海銘源（233）及中國燃氣（384）突然大插水，雖然午市兩隻股份反彈番唔少，但好多老友已被嚇親，話君子不立危牆之下，打算沽貨套現，留番啲錢過年。
上海銘源早市低見0.54元，收0.78元，仍跌17％，成交股數2.14億股，金額1.69億元。至於中國燃氣，最低見過0.75元，收1.01元，跌18％，成交股數4.22億股，金額4.36億元。
經紀陳話，兩隻股嘅幕後炒家雖然有關連，但玩咗咁耐，實際上已有分別。上海銘源炒味濃郁，但部份炒家實力一般，所以出現噚日的插水驚魂，經過今次一役，上海銘源想重整旗鼓都要一段時間。
至於中國燃氣，畢竟獲得中石化（386）入股助陣，所以點都硬淨好多，公司即將在12月10日公布中期業績，江湖傳聞非常靚仔，因此兩隻股嚟計，要博反彈都係中國燃氣好啲。
慕容小初