金龍發展拆售旺角銀城廣場地庫動感銀城全層，七十四個舖位，噚日內部認購。代理話，超額三倍，而且喺個幾鐘頭內全部沽清，套現超過兩億，呎價平均大約三萬。
美聯盧展豪話，舖位最細五十五呎，最大二百五十八呎，實用率有四成六，售價由一百九十五萬至七百八十五萬。
最豪嗰位買家，一口氣掃入十幾個舖位。據講，佢係買開住宅嘅投資者。
蘭西噚日路經西洋菜街南二A號嘅銀城廣場，見裝修工人整理緊個售樓處，美聯原定今日下晝五點正式開售，𠵱家變咗係簽約儀式，即係今日唔會有舖位賣。
呢個場食住行人專區概念，加上喺核心地區，銷售速度以及造價，比之前幾個場更理想。
旺角西洋菜南街，平日下晝四點起唔畀車入，假日就由中午十二點開始，人流一定唔成問題。但係日後租客組合會係點，租金回報率到底有幾多，就要拭目以待。
蘭西噚日參加香港總商會「國內房地產及基建項目管理的風險」講座，佢哋請咗高鋒宏道大中華區總裁王勝泉，分享喺內地處理過嘅case。
佢點出，喺內地，一份合約唔能夠保障你嘅投資，懂門路、搞好關係先至最重要，有事一定要通過大家「友好協商」，使啲錢去解決糾紛，千祈唔好同內地人硬碰硬，因為內地人同官，都好記仇，又好怕做新聞人物，如果搞大件事，變咗新聞，第二日你就有排煩。
地鐵將軍澳夢幻之城，最近邀請發展商遞交意向書，身為將軍澳中心發展商之一嘅華懋，都話有興趣。華懋售樓部經理吳崇武話，地鐵肯畀一半補地價，點都吸引過九鐵。
至於九鐵嘅項目，佢話要睇地區，馬鐵烏溪沙站咁遠就冇乜興趣，西鐵荃灣西同南昌站呢兩個，都可以考慮吓。
夢幻之城係唔少發展商覬覦嘅大型發展項目，華懋有興趣，一啲都唔出奇，不過蘭西相信，其他發展商缺乏土地儲備，一定會比較心急，而早着先機嘅華懋，先後兩次投得沙浦道地皮，就算參與競投，都可以從容應付。
近排幾間主要代理行，喺報紙大賣形象廣告，一時間重以為係發展商賣樓廣告，或者電影宣傳。
大型代理財雄勢大，相比之下，中小型行資源有限，想多做廣告宣傳，其實唔容易。不過，細有細做，一啲喺地區扎根嘅地頭龍，好多時都會趁過時過節，出啲應節小禮品，派畀街坊客戶。
屯門地方勢力祥益，啱啱印好一批○五年年曆卡，營業董事盤嘉茵話，送年曆卡，係公司嘅小小心意，感謝街坊對公司二十幾年嚟嘅支持。
祥益今年已經連開咗六間舖，𠵱家已經擁有二十間分行。
電郵地址：