每年聖誕都會見到唔少人扮聖誕老人，但大家有無諗過同真正嘅聖誕老人見面呢？噚日八方就有幸同遠道由芬蘭嚟到香港、世界上唯一真正嘅聖誕老人見面。
正牌聖誕老人身高有成兩米，佢話佢今年有成差唔多四百歲，所以先生得咁高。佢又話，好耐好耐之前，芬蘭已經有聖誕老人，每逢聖誕節出去派禮物，佢係𠵱家唯一仍然存在嘅聖誕老人。平時聖誕老人住喺芬蘭北部嘅聖誕老人村，嗰度有間佔地一千平方米嘅大屋，佢每年就喺嗰度接待四十萬冒名去見聖誕老人嘅旅客。
唔好以為聖誕老人平日同人影吓相、傾兩句好輕鬆，佢為咗可以同世界各地嘅人溝通，學識咗講十種語言㗎。同埋每年聖誕節有成幾十萬封信寄畀佢，希望得到佢嘅回信，聖誕老人同幫佢手嘅小矮人就要不停睇信同回信喇。
聖誕老人今次嚟香港，會一直留到下星期二，其間重會去幼稚園探訪，派吓禮物畀聽話嘅細路仔。佢噚日去尖沙嘴文化中心行咗一轉，好多市民見到佢都好開心。如果想同聖誕老人見面，今日下晝可以去美麗華商場，佢會喺嗰度同大家影相㗎！
（圖）學生妹妹一見到正牌聖誕老人，即刻攬住佢唔放。
陳亮華攝
傳真︰2623-9278
電郵︰