椎名林檎以往喺唱片同MV入面有好多令人印象深刻嘅打扮，過往亦只肯為《RockinOnJapan》、《音樂與人》同《Switch》呢啲高檔音樂雜誌影相，甚少喺時裝雜誌出現。不過，呢排林檎為咗加強佢隊樂隊「東京事變」處女大碟《教育》嘅宣傳，終於破天荒亮相《InRed》、《PSPrettyStyle》同《Spring》呢三本時裝雜誌，重做埋封面人物，真係巴閉過時裝雜誌常客濱崎步。
林檎喺三本雜誌封面示範唔同款式嘅冬裝，有迷彩onepiecelook，又有毛毛披肩加牛仔褲look，睇落一樣咁潮。佢重同大家分享減壓心得，佢話：「我平時會去shopping減壓，重特登去啲精品店揀啲好貴同好古怪嘅嘢嚟買！」
成日俾人覺得癲癲哋嘅林檎，原來細個都好似一般小妹妹咁學芭蕾舞，佢自爆話：「但因為我出世嗰陣做過肩胛骨手術，手腕同肩膊有啲彎曲唔靚，唔適合跳芭蕾舞，所以被迫放棄。」林檎又話好享受𠵱家同四個男人一齊夾band：「組成東京事變嗰陣，好有結婚嘅感覺，令我消除呢幾年一個人唱歌嘅不安感覺㖭！」
此外，日本涉谷同新宿等多間大型唱片連鎖店，𠵱家展出緊東京事變成員喺多首MV中所着過嘅服裝。