銀行界前輩賓架Y已經八十幾歲，精神到極，晚飯應酬甚多，佢幾個仔女、新抱、女婿，幾乎人人都係康奈爾、MIT畢業生，只係細仔喺劍橋畢業，牛津深造，芝加哥哈佛做研究，無怪細仔好快就做咗中大講座教授。我哋班後輩童言無忌，同賓架Y開玩笑，話新加坡政府好恨叻仔與叻女結婚，生番幾個好叻嘅下一代，賓架Y啲血統咁好，有啲似種馬Danehill（丹山），好應該益吓新加坡，去嗰邊培育更多下一代也。賓架Y哈哈大笑，話益吓香港好過，佢已經盡晒男士本份，你哋班後輩唔好再記住黃霑歌詞︱︱兩個就夠晒數︱︱應該人人播種一打半打︱︱起碼救番一啲將被殺校嘅小學先喇！
賓架Y年紀大，識得好多上一代人物，佢講起大畫家身後，不勝欷歔。大畫家與繼室（人稱師母）年齡相差近三十年，晚年全靠師母照顧打點，生前好關心啲仔女生活，為每人置業，知道自己有病之後，又贈送現金達七位數字，以為身後事安排妥當啦。點知呢頭出殯之後，佢嘅居所已經俾人更換門鎖，師母入唔到屋，惟有與香港拜拜，以後怕且唔會返嚟咯。好彩師母放得開，將大畫家在港畫作捐晒畀博物館，有人要爭嘅話，自己去麻煩可也。
博物館得到呢批名家作品，尚未展出，要等一輪先。賓架Y老友賓架H係書畫收藏家，賓架H話呢批作品一定會漲價，博物館出一億港元都未必買得到，他日展出，大家一定要去睇，睇真啲本土文化，唔好淨係話要睇畢加索《巡遊》。我哋笑一餐之餘，覺得家財帶唔得上天堂、地府，畀仔女最大嘅遺產就係供佢哋讀書，如果好似賓架Y細仔Y教授咁叻就最好啦。尚有餘錢，最好捐晒畀大學及研究機構，向美國啲大富豪蓋茨、畢菲特、SidneyFrank等人效法。