白韻琴和林燕妮的罵戰升級，白韻琴直指黃霑和林燕妮的相識如電影《孽緣》，更指她所寫的是「死無對證」。林燕妮則揶揄對方博宣傳，並表示霑叔去世，她也十分傷心。
白韻琴日前公開指摘林燕妮不該在雜誌上揶揄黃霑遺孀Winnie，林燕妮前日即反駁：「我講真話關佢乜事？」又嘲諷白韻琴聞霑叔死訊後，哭起來老得像霑叔母親。兩位八十年代紅遍香江的才女罵戰昨日再升級。
白韻琴在電話中說：「點證明佢係真話？點解人哋健康在世時唔講，人哋去世冇得對證，任佢噏晒啦！可能係明屈。我知佢係話我老之嘛，唔緊要，我唔怕老，最怕冇得老，佢都冇機會短命啦，佢一定唔會後生過我，我係（黃霑）阿媽，佢都唔會好得去邊，好過佢係《FatalAttraction》（電影《孽緣》）啦！」
白韻琴續說：「林燕妮對霑叔唔係咁好，但當時全世界覺得霑叔拋妻棄子同林燕妮一齊，如果佢兩個分手，全世界實鬧佢，霑叔都幾忍佢，我覺得霑叔識佢，簡直係《FatalAttraction》。」
林燕妮昨日在電話中則反駁說：「𠵱家死無對證，白小姐作啲乜出嚟我唔理，我只講自己嘅事實，我同James（黃霑）一齊十幾年，白小姐又冇同我哋一齊住，點知咁多呢？我不屑同白韻琴罵戰，我光明磊落，唔會用『呢個女人、嗰個男人』呢啲鬼鬼祟祟嘅字眼怕人告，我可以講畀全世界聽，你哋想出風頭、要針對我、篤我、用箭射我，我唔會理你，亦擔當得起！」
林燕妮自言不是偽善的人，講往事亦不是要抹黑黃霑，她說：「以前佢係有講大話，我信晒佢，冇理父母，咁我話『對唔住父母親』有乜問題？佢作詞、作曲嘅才能係冇人否認。」
提到林燕妮兩名胞弟、舊情人黃霑在一年內先後離世，林燕妮感觸地說：「你估霑叔死咗我會開心咩？咁佢咪休息囉，唔使再捱！個天冇叫我死、叫我留低，我咪繼續寫作，總之一句：我唔在乎！我係我，我過我嘅生活。」林燕妮又表明不會出席明天的黃霑追思會，會以自己的方式懷念他。
採訪︰林妙萍
