雖然NDS喺香港嘅熱潮稍歇，不過日本前日先正式開始發售，咪以為㗎仔玩慢港人咁多好蝕底，查實跟日本同期推出嘅Game先係焦點所在。美版NDS搶飲頭啖湯，有《SuperMario64DS》護駕，日版氣勢重勁，華利奧、比卡超等紛紛蒲頭，加埋幾隻過癮到痹嘅Game，家陣NDS入貨係時候。
記者：徐影龍
攝影：黃子偉
喺12月2日，NDS正式登陸日本，任天堂預計出貨50萬部，對比日本需求當然唔算多，卒之搞到好似之前《DQVIII》咁，所有Game舖要晨咁早6:55正式開門做生意。而㗎仔一鋪排隊癮亦得以發揮，多間大型商舖如BigCam、Softmap等早一晚已出現瞓街人龍，之前排過《DQVIII》嗰班先慘，隔唔夠一個禮拜又要再排過。閒話吹完，正式介紹新鮮熱辣到港嘅幾隻殺手級正Game。
篤爛芒都要玩
以任天堂慢工出細貨定理，《MadeInWario》系列都算出得密。早幾個月先喺GBA出過內置感應器嘅版本，話咁快又有新版本登陸NDS－－－《TouchMadeInWario》，證明任記對呢隻Game幾咁有信心。
玩過「Fing機」，今次以輕觸式屏幕作賣點，用支筆嚟過關。玩過前作嘅都心知每集極之抵死頂癮，幾秒鐘一關冇錯係好濕碎，不過成200款迷你遊戲，要玩熟晒都唔係咁容易。尤其係以筆代替十字掣，變化更大！而且一貫「惡趣味」，好多Game抵死得嚟有啲猥瑣，好似「唧」大隻佬胳肋底、接住鼻涕等，包你笑到收唔到掣！真係唔明，點解PDA咁多年都出唔到呢類遊戲？
呢個系列嘅特色，係好多迷你遊戲過關方法都好刁鑽，基本上唔「瀨」過嘢都唔曉過關（不過間唔中都會連「瀨」幾嘢，但對過關方法仍然茫無頭緒）！煲咗幾粒鐘，依舊俾佢嘅密集式遊戲所吸引，刺激到要聚精會神係咁「咪」，不停咁喺度篤篤篤、畫畫畫，好難收到手。想個芒襟玩啲，幾十蚊塊保護貼一定唔慳得！
《TouchMadeInWario》$350
一筆勾銷考反應
《直感一筆》雖非名作之後，但其創意及過癮度，絕對唔會比《TouchMadeInWario》輸蝕。遊戲規則好簡單，一筆過任你畫，畫過之處黑白會反轉，打橫連成一行同顏色就可消除，亦似《俄羅斯方塊》不停跌新方塊落嚟，絕對考你反應急才。
相信好多人如筆者起初一樣，好普通嘅智力Game啫，點知玩落又再瀨嘢！諗計點樣可以一筆畫落去，繼而消去大量方塊，原來好鬼快感！貪心啲趕喉趕命咁連埋上去，不斷咁為下一輪攻勢作準備，Combo駁極唔停、分數又猛跳，刺激度滿瀉，筆者強力推介！
起初會難上手啲，筆者提供幾個心得畀大家；第一係小心運用外圍兜路走，盡量一次過畫晒外圍嘅方塊，但又唔好太貪心不顧時間；第二係「卡啦」方塊嘅處理，基本上以「口」形圍一圈，就有路畀你行，唔使逐下「啄」；最後係要夠冷靜，好多時因為手掌掂到屏幕而誤拉直線，返轉頭再畫就蝕晒喇。
《直感一筆》$290
見習生亂開刀
又一款創意爆棚嘅Game，玩家擔任一名見習醫生，由聽診到開刀做手術都要識，玩法係根據提示決定下一步應該點做，又或搵邊個幫手。
起初以為開刀咁微細嘅要求，唔識日文一定玩唔掂，玩落原來又唔難喎。以做手術為例，一開始要決定搵邊個做麻醉師，之後搵人遞把手術刀畀你，跟住就精采喇，依指示劏開病人某個部位，斜度、劏開長度等全部靠估；一刀劏錯，病人就一路呻吟，兼且生命值猛咁跌，筆者最後把心一橫，畫咗條超過400%嘅刀痕，個病人就同筆者一樣，即時GameOver！閒時又會聽吓女病人嘅心跳、撩下靚女姑娘等，不得不佩服日本人嘅厚面皮，居然將不文嗜好擺埋落Game度。
《研修醫：天堂獨太》$370
為剪影而死
世嘉搞搞新意思之作，齋睇個Game名，《為妳而死》咁激情，只會令筆者聯想起《櫻大戰》，原來跟《TouchMadeInWario》一樣，玩迷你Game大雜燴，認真無厘頭。
畫面所有角色均以剪影表達，個個「黑麻麻」，唔係着住比堅尼，都好難認出佢係女！一堆迷你遊戲算係不過不失，可惜大大粒《TouchMadeInWario》珠玉在前，始終被比下去，筆者就寧願世嘉出番隻NDS版《肥瘦大盜》。遊戲較可取係故事交代部份，一時上下芒Show主角個樣，一時又以四格漫畫式表達，好有故事性，亦令人恍然大悟，為討好心儀對象，死又何足惜呢？
《為妳而死》$370
售賣點：DreamStore
查詢電話：25753285
地址：灣仔東方188商場256號舖