長實同新地合組競投西九項目嘅財團活力星，噚日由長實女將吳佳慶、新地執行董事蘇仲強，聯同春天舞台嘅高志森、杜國威一齊開記招，公布雙方結成策略性夥伴，春天舞台將為西九將來嘅兒童劇場提供劇目。
高志森果然係搞舞台劇出身，一開聲就話要從黃霑講起，回憶曾任劇團藝術總監嘅霑叔生前成日問佢，演藝畢業生究竟搵唔搵到食。
講咁多，都係想證明要有多啲劇院，先解決到演藝學生失業問題，高大導透露有百老匯舞台劇團搵佢合作，但未有場地未成事。不過唔使等到西九起好，春天舞台今年聖誕已經有一場兒童舞台劇由活力星贊助，高大導好開心咁話，單係宣傳單張，有龐大管理公司網絡嘅兩大地產商已經幫佢寄到四十萬住戶家中。
（圖）左起：杜國威、吳佳慶、高志森、蘇仲強同埋寶珠姐公子楊天經一齊為活力星造勢。
傳真︰2623-9278
電郵︰