陳冠希個家姐陳見飛早排喺澳門法庭上認罪藏有可卡因，獲輕判罰二千蚊，重不留案底，點知佢返到香港又發聲明話自己冇藏毒，重話唔知點解新手袋裏面有毒品，認真離奇！
陳見飛出事後，前晚就好正氣咁喺中環IFC免費幫香港癌症基金會舉行嘅慈善酒會做司儀。陳見飛一聽到「澳門」兩字就話：「唔想提喇，之前我已經解釋晒喇，識我嘅都知我唔會吸毒，𠵱家我要向前看！」佢又話件事搞到家人同朋友好擔心，好彩大家都好支持佢，陳見飛重好感慨咁話：「愛真係好重要！」
陳見飛又話𠵱家嘅工作比以前多咗，佢話：「件事冇影響到我工作，公司重叫我唔好退出娛樂圈，叫我再做多兩年先，本來我有部劇客串，喺呢件事件之後，佢哋重叫我做女主角，不過我見有成四十頁劇本，我驚做唔嚟，所以都係做番配角囉。」之後佢又話以後會小心啲買嘢，馮仁昭聽完後都覺得好好笑，重想八吓喺邊度買手袋會送可卡因㖭！
黃聖依噚日接受商台訪問，佢話喺一次卡拉OK聚會上，周星馳聽到佢嘅歌喉後，要求佢主唱《功夫》插曲《只要為你活一天》，後來星爺又要求佢唱埋主題曲，卒之喺《功夫》電影原聲大碟入面，佢唱咗三首歌。呢張碟本月中推出，黃聖依話視星爺為前輩同師長，所以唔怕同佢傳出緋聞。
梁詠琪（GiGi）噚日去商台出席《叱咤樂壇星光大造》記者會，GiGi話唔排除退休後會移民外國，因為佢覺得香港嘅空氣實在太差啦，加上佢有鼻敏感，所以香港嘅環境令佢好易唔舒服。另外，GiGi亦話唔贊成拆紅灣半島，因為污染之餘亦都好嘥錢、好唔環保。
譚玉瑛縱橫無綫兒童節目二十二年，無綫近期改革兒童節目，有傳會棄用呢位元老。譚玉瑛噚日喺將軍澳度透露無綫一定會用番佢做兒童節目主持。
譚玉瑛話：「我嘅合約到明年三月，我唔會要求加人工，今時今日唔減就算，但唔係今次件事，都唔知有咁多人關心我嘅動向。」
張曼玉（Maggie）前夫、法國導演阿薩耶茲（OlivierAssayas）噚日去台灣宣傳。問佢同Maggie𠵱家嘅關係，佢透過繙譯面紅紅咁話：「我們是好朋友，我希望她有美好的新戀情。」阿薩耶茲又話睇咗《2046》，佢覺得Maggie戲份好重，因王家衞電影入面愈唔存在嘅角色愈重要。
噚日商台宣布咗「叱咤樂壇我最喜愛的男女歌手」五強，等樂迷出席頒獎禮時現場投票。其中男歌手入圍嘅有「新四大天王」嘅古巨基、許志安同李克勤，但梁漢文出局，換咗周杰倫同林一峰；女歌手就有容祖兒、楊千嬅、何韻詩、陳慧琳同梁詠琪，組合三強就係at17、Twins同F.I.R.。
