今日講吓炒輪嘅少少竅妙。喺窩輪鱷魚潭行走嘅朋友，通常都有個時候手忙腳亂，就係當一隻正股郁之時，搵相關輪（近排當然係C輪而唔係P輪）炒，輪多眼亂，唔知搵邊隻埋手，揸住張行情表，用間尺逐行逐行摷，摷得嚟蚊瞓。上網㩒，搵啲同類輪比拼，又係費時失事。最好嘅做法，係先用張紙抄低正股，搵出相關嘅窩輪對象，抄低冧把，大約有30隻熱門股，做呢個功課大約只需30分鐘。一見正股郁，或者估計佢會郁，即刻喺張紙上，摷出對象，發盤做嘢。
例如昨日中銀（2388）郁，唔使摷行情表，即刻撲落隻9169，先幾日都提過呢隻輪，另外嘅對象係9981。呢張紙，可以每隔三兩日update一次。至於相關正股揀邊隻輪，揀輪條件當然係交投活、屆滿期稍長、溢價相對較低、槓桿率相對較高。冇可能所有數據都符合所有對象，退而求其次可也。有啲正股，可能只得1隻窩輪對象。例如新世界（017），如果要揀輪，只得9667睇得上眼。一見新世界郁，買C輪，唔使諗，剔9667可也。
國泰C輪：油價又散過，國泰（293）飛機巨型零件高空飛脫都冇影響，股價再升0.30元，前日已經升咗0.45元。吼住若見國泰回吐，執多少C輪，正路之選係4504，明年3月夠鐘，輪價85仙，溢價5.9%，槓桿率17.1倍（有效9倍），引伸波幅26%，亦可諗吓4482，夠長命，06年到期，溢價高啲冇問題。
章盛