近期股市焦點，似乎已由濠江賭股轉至大型新股，領匯（2382）已成市民日常話題，至於昨日掛牌的神威藥業（2877），首日表現唔差，升10.67％，捧場客皆大歡喜，難怪投資者將視線轉移去新股。
不過亦唔等於細價股冇人做嘢，好似中洲控股（351）公布向副主席兼北京中信掌舵人王軍嘅千金，發行新股收購東莞中科環保電力股權，噚日復牌股價即刻炒上，最高見過0.85元，收0.77元，仍升15％，成交股數2654萬股，金額2092萬元。
經紀陳話，江湖傳聞中洲控制權最終會交予千金，所以呢單新聞一出，惹來無限憧憬，而炒家亦係有心有力之人，所以場面好熱鬧，但中洲家陣距離變身仍有一段路程，大家勿太過興奮。
另外，有兩隻證券股近日靜靜地起革命，包括結好（064）同埋美建（335），兩股最近股價創高位，江湖傳聞佢哋各有搞作。
慕容小初