前兩日有行政會議成員同傳媒講，好唔滿意煲呔向行會提交嘅西九文件，得嗰幾頁紙仔。噚日有行家同周太周梁淑怡講呢單嘢，周太第一時間問：「係咪CY（即梁振英）講㗎？」
唔知周太係咪暗示梁振英有意將煲呔射落馬呢？至於份文件係咪真係得幾頁紙，周太始終好口密，唔肯評論。
煲呔有幾頁紙畀行會都算係咁啦，最近審計署摷番愉景灣勁鬧，飛哥同八方講，佢都唔知道有件咁嘅事，因為當年CS好大權力，可以決定咩文件上行政局，咩文件唔上，連行局首席議員都冇符。
另外，八方聽到立法會將會搞個扶貧委員會，八方聽聞田少好想做主席，但形勢睇嚟唔容許，因為根據目前嘅報名情況，保皇黨唔夠民主派多，民主派當然支持馮檢基做主席。馮檢基話，聽人講周一嶽好似唔想政府搞扶貧委員會，因為覺得搞咁多委員會都做唔到嘢，不如直接去傾重好！
傳真︰2623-9278
電郵︰