蘭西噚日講過加拿大一個五年樓花TrumpTower嚟香港推介，今日又忍唔住講吓佢嘅獨特宣傳，發展商話事人特朗普（DonaldJ.Trump），亦即係美國人氣騷飛黃騰達創作人兼主持之一，透過公關公司向傳媒送出真金白銀紀念品一份，所有曾參觀過亞洲區展銷會嘅人都會有。
呢項紀念品，相信唔構成賄賂或者妨礙新聞自由，因為只係一張直板一蚊美金，鑲喺一張黑底銀字嘅答謝卡上，下款重印埋當奴個親筆簽名，卡上寫着：多倫多係我喺世界上喜愛嘅地區，冇嘢好得過偉大嘅物業同時成為偉大交易，我樂意貢獻我部份財富，助你邁向TrumpTower嘅投資。
幽默之餘，亦不失一份令人難忘嘅誠意。
小財唔出、大財唔入，就係最基本嘅生意道理。
聖誕節既然係普天同慶，喺慶祝之餘，都應該關懷吓不幸嘅一群。
尖沙嘴海港城就放咗近八十棵慈善聖誕樹，為香港血癌基金籌款，由港威大廈一直排到海港城。
由今個禮拜六起，去海港城捐五十蚊，就可以獲得一張「愛心聖誕卡」，可以寫上個人心願，然後掛喺聖誕樹上。一齊布置之餘，重可以令節日變得更有意義，蘭西梗係支持啦。
呢個咁有意義嘅活動，最遲今個月二十五號就完㗎嘞。
西灣河海邊嘉亨灣，向來以海景做賣點，今次解封，恒基話，全新印刷咗一輯廣告，宣傳個盤。
發展商要凸顯呢個西灣河嘉亨灣係一個臨海高級住宅，將物業同國際類近嘅臨海名廈相提並論，好似紐約嘅TrumpWorldTower、澳洲嘅黃金海岸Q1Tower，倫敦嘅FalconWharf，同埋東京灣嘅St.Luke'sGarden等，以凸顯呢個樓盤嘅身價。
雖然未必所有買家或者睇樓市民，都親身體驗過呢類國際級名廈嘅氣派，但係港島區嘉亨灣，今日重開，大家就有機會實地睇吓。
地鐵推出將軍澳八十六區第一期招收意向，唔知係咪咁，加速部份業主低價出貨決心，將軍澳廣場一座高層E室，五百六十九呎，剛以一百六十三萬售出，呎價近二千九，但低市價一成。
聽講業主係見近月市道淡靜，既然重有錢賺，不如收錢為上，賺三十二萬離場。利嘉閣劉卓豪話，同類單位一向賣百八萬。
屋苑十一月共有十七宗買賣，比十月少兩成，呎價企穩三千一百五。
當今竟然重有業主鬥平賣地，較早時裕泰興標售西環一幅酒店地皮，連上蓋建築賣億五，今個月十五號截標，附近另一幅商住地，噚日招標，索價五千八百萬，平過九叔嗰件，十二月二十三日截標。
第一太平戴維斯代一名廠家標售干諾道西一三七至一三八號地盤，約二千八百呎，可建三層舖以及四十四個海景住宅，總樓面四萬二千呎。
以五千八百萬成交價計，大約千四蚊一呎樓面地價，連埋建築費都唔使三千蚊，比起九叔連上蓋建築賣三千七着數少少，不過唔同在於一個以酒店計，一個以商住計。
自由行政策，大大促進本港經濟復甦，中央政府三個月前，再度放寬內地民企自由行，進一步推動內地企業來港。
為咗了解內地企業，有意來港發展情況，美記喺廣州向二千零二十八間企業進行問卷調查，其中百分之四十三受訪企業，對有關政策感興趣。當中百分之十四，更會積極考慮來港發展。
美聯廣州總經理潘偉雄話，較出名民企如小肥羊、譚魚頭，相繼來港發展，成績有目共睹，相信會吸引更多民企來港，推高商舖租金。
有意來港投資嘅受訪者，需要租置廠房及舖位的比例，分別為三成七及一成八。
香港每年都吸引大量旅客嚟觀光或者做生意，但有啲遊客唔一定鍾意睇風景或者購物，竟然喜歡睇樓。話說有個台灣遊客，嚟香港旅遊，見到香港建築物好獨特，於是走去參觀豪宅盤，當係行程節目之一。
佢先後睇咗三日樓，覺得九龍站上蓋君臨天下好正，決定買番間嚟收藏，用一千八百五十萬，買咗間二座高層B，面積近一千五呎，呎價一萬二千六。呢個遊客都算係另類嘞。
中原關正安話，其實前日都有一個外籍客喺旅遊期間，用六千七百萬，買咗三個君臨天下單位。
電郵地址：
