美股帶動，港股再漲近百點。滙控（005）慢慢嚟，又進帳1格，1格即係50仙，啲滙控C輪遠期嗰批，冇溢價，跟正股升5仙左右，大概每兩日升10%，揸得嚟安心，唔使抹汗。
中鋁C輪：國內金屬股隻隻有得升，勢靚，C輪炒得過。有C輪發行嘅，只得馬鋼（232）同中鋁（2600）。馬鋼升2.4%唔係好多，但馬鋼C輪4695已急升17%，驚有回吐，搵中鋁C輪埋手比較上算。中鋁收5.05元，升12.5仙。中鋁C輪2167升5仙，4533則只升得3仙，就揀4533短炒。4533明年6月到期，輪價51仙，溢價19%，槓桿率9.9倍（有效4.5倍），引伸波幅49%。溢價的確唔便宜，但炒遠期輪，炒三朝幾日，只要成交夠（4533昨日有39球易手），溢價唔使太着重，反正係高（溢價）來高去（溢價）。
電盈C輪：電盈（008）配售盈大（432），盈大前日散完之後昨日好番，重上配售價，電盈則繼續有啲爛泥味，企定喺4.775元，人郁佢唔郁。
電盈今日將盈大持股量由75%降到51.1%，套現11.2億元，早前又以28.09億元出售鰂魚涌總部，套現後應有後着，至少唔使孭重債，更可谷大盈利，整靚盤數。賣盈大股份作價每股2.48元，成本好似個幾，真係賺到笑，04年張成績表，好易靚爆鏡，隨時炒落後。揀電盈C輪，9814下月夠鐘，時間不利，揀4664比較適合，明年6月到期，到時04年盤數已經出咗，如果正股上番年初6.60元個位，隻輪就值1.72元，係現價0.42元嘅4倍幾。
章盛