國泰七七七航機，喺曼谷起飛，個引擎爆出火星，跟住金屬導管脫落，跌落地面兩架車車頂，有驚無險！
在殖民地時代，國泰由太古獨資，飛行平穩安全，重變咗全球數一數二嘅航空名牌，三萬哩高空，可靠、舒適、歎世界，唔知點解，近年頻頻有事，又喱又嚕！
有一種講法：話一個地方若然受到大陸影響，一定會陀衰地運！例如香港，九七前係東方之珠，舉世讚頌，九七後就當堂失色，任憑啲老左點樣賴老英埋地雷、或者董團夥磨合未成功，總之就係一換咗支旗，即時全線死火！
國泰亦似乎唔例外：英資太古臨九七，賣咁部份股份畀中資，一有中資入侵，咁喺玄學上，當堂就改變咗氣數命運嘅分子結構！唔知係咪啲中方管理，水質同本來嗰隻相沖，總之基因一旦改造，跟住就有好多唔同！
國泰飛行咗成幾十年，有幾何好似𠵱家咁，呢處爆一團火屎，嗰頭又鬆咁幾粒螺絲！若然係有啲外資加入咗，搞到搭沉船，咁就要改組股本，唔好咁「愛國」，因為人命關天！
七年半以來，董團夥頻頻甩轆，東九龍、紅灣半島、公務員減薪，鑊鑊都見燒引擎，冒晒火花，架機重要左搖右擺，雖然掟咗幾個落機（例如松松同埋靚仔強），以為減咗重，慳少少油，點知一樣咁驚險！
嗱，好似紅灣半島，就點只係燒引擎咁簡單！當初賤賣八億，鬍鬚孫以為市價低，咁就證明喺佢心目中，樓市冇可能好轉！
作價八億，由鬍鬚孫拍板，董建華撐腰！當時又係孫某一再重申，唔會停建居屋！咁個地價就梗係賤喇！若然佢一早就果斷宣布：停建居屋，地價就自然「唧」上去，跟住再賣畀新地，就點只八億咁賤？
商人要賺多啲，天公地道，拆過再起，罪責在於賤價賣地嘅嗰個倒米壽星！
董團夥管治意志崩潰，孫明揚單人孤軍作戰，三屍十一焗個個蹺埋手睇嘢，「執政大聯盟」去咗邊？乜唔係要靠自由黨同親中民建聯嘅頭頭同政府吹雞咩？比起前幾年，公布甚麼「救市八招」，郁親就全體高官擺陣大晒冷，以示立場一致，今時今日，個個隱形，重有個廖秀冬爭住插刀攞彩，睇見孫明揚一支公，真係可憐！
鬼叫佢唔學黎慶寧及陳太，一早就唔撈，係都要賴死，搞到今日自作賤？怨自己啦！
傳真︰2623-9278
電郵︰