許愿前晚到灣仔睇首映，他力撐前妻李麗珍，拒絕評論馬桂燦太太李靜婷的爆料性書，自言與珍妹修好的他又大爆珍妹曾自言真心真意對待朋友，今次受傷，當是一場教訓。
許愿、陳淑蘭、伍詠薇等，前晚在灣仔會展欣賞電影《合盜偷天》首映。自從李麗珍前男友馬桂燦（JackyMa）前妻李靜婷出爆料性書《珍人真事》後，珍妹未曾露過面，珍妹前夫許愿前晚甫見記者，提到《珍》書時說：「係喎，我對呢件事都冇表態過，不過我唔會為呢本書表態。」
許愿謂不願替人宣傳，他說：「我唔支持新書，我都幫一份報章同珍妹做咗個訪問，我之前訪問咗好多藝人，之後會輯錄成書，叫做《新愿成真》。」許愿去年與珍妹為爭女兒撫養權而鬧不快，但前晚卻力撐珍妹說：「我同佢意見一致，唔支持本書。佢情緒OK，處理件事都好理智，好值得欣賞，我見佢心情非常好，我哋都唔會為呢件事回應。」
許愿謂一向與珍妹都有因女兒而保持友好關係，他說：「我哋一齊變好，曾經有段時間我係好想攞番個女，但𠵱家好咗，變幻才是永恒，二○○三年係唔開心嘅一年，可能心情都有影響。」
許愿有否提醒珍妹小心交友？他說：「佢有好多朋友好疼錫佢，有啲朋友會提醒佢，佢對朋友好真，付出好多，對人好亦望人對佢好，今次佢受傷算係教訓，以後要帶眼識人，珍妹重同我講，佢攞個心出嚟，冇諗過人哋唔當佢係朋友。」許愿表示珍妹現在沒有男友，問他與珍妹現時的關係，許愿說：「朋友囉，亦係一對好嘅父母，比朋友更犀利。」
採訪：馮美茵 攝影：陳偉權
