黃霑上周辭世後，其家人前日簡單地為他舉行葬禮，但紅塵恩怨卻未因此了結，霑叔好友白韻琴昨日凌晨在港台接受訪問時，指摘林燕妮不該在雜誌上揶揄霑叔遺孀。林燕妮昨日得悉此事後即「禮尚往來」，指白韻琴聞霑叔死訊後哭得像霑叔的母親一樣，兩位八十年代紅遍香江的才女展開罵戰。
黃霑生前曾公開承認追求白韻琴不遂，但二人仍是好朋友，上周白韻琴得悉霑叔去世時，傷心得哭成淚人，並憶述霑叔當年追求她時一日寫五封情信，又唱歌給她聽的甜蜜情景，淒酸動人。白韻琴昨日凌晨與男友謝偉俊到港台接受曾華倩訪問，提起霑叔時，她不時借故揶揄林燕妮，但卻只以「呢個女人」來稱呼對方。
白韻琴表示霑叔低調進行喪禮的決定十分明智，她說：「佢由至親至愛寧靜咁送佢走，唔好俾啲人嚟搗蛋，唔好有啲預測唔到嘅事發生嘛。佢生前係風流才子，唔知到時有啲乜嘢人走出嚟做啲乜㗎。」提到林燕妮日前接受周刊傳真訪問時，講述當年霑叔與她分手的情況，又揶揄霑叔的遺孀Winnie陳惠敏「扮低調賢妻」，白韻琴不滿地說：「我覺得呢個女人好唔聰明，呢個時候重嚟數落霑叔同佢至愛，好唔應該，對Winnie好唔公平，有知識嘅人都知，Winnie對霑叔嘅愛係嗰個女人永遠都做唔到。」
白韻琴表示曾多次與Winnie碰面，對方在霑叔人生後期給予的關心及愛護是無可取代的，大讚Winnie居功至偉，她說：「霑叔好多幸福都係Winnie畀嘅，有人要妒忌真係好難講，霑叔係真心愛Winnie。」
白韻琴在節目內憶述霑叔的生平軼事時，又一度激動至手震及痛哭，她說：「霑叔風流，佢愛一個女人會好上心，當佢同一個女人好嘅時候，如果又同另一個女人發生嘢，咁一定有佢嘅原因。」
白韻琴謂當年霑叔「一貧如洗」時仍然樂觀，她又意有所指地說：「佢當時同我講唔知點解搞成咁，同人哋一齊嘅時候以為乜都有，銀行有，又有屋，點知分開咗就乜都冇，佢話欠人債係衰戇居。當時阿Paul（謝偉俊）提議佢搞破產，霑叔話破產即係賴帳，佢唔想做契弟，佢唔會做呢啲嘢。」不過，白韻琴表示因怕自己太傷心，不會出席霑叔的追思會，只會與阿Paul靜靜地找個地方作思念。
對於白韻琴的言論，林燕妮昨日在電話中駁斥說：「呢個人唔知關佢乜嘢事，佢個人有事冇事都走出嚟㗎啦，佢太興奮喇！我同霑叔一齊時，佢喺邊？真才子好多時都鍾意寫信畀女仔，可能嗰啲信係我代筆㗎！」
林燕妮又續說：「有日睇報紙時，我個菲傭行過，見到佢喊到死吓死吓咁慘，重以為佢係James嘅媽咪㖭。」
對於白韻琴指黃霑與林燕妮分開後變得一貧如洗，林燕妮說：「唔關我事，我娘家都係有錢人，我媽咪持有白建時道十一號一幢三層獨立屋，唔信你去田土廳check，嗰時宇軒同宇詩（黃霑子女）都有嚟過。我買過嘅股票、買屋全部都係自己錢。我同James大家各自有自己收入，佢嘅收入亦唔會畀我，我只知道佢喺廣告公司嘅收入，佢其他作曲、作詞嘅收入，用咗去邊，我完全唔知。」
對於外間指摘她不該在敏感時期大爆情仇，林燕妮強調自己只是說出事實，沒有傷害任何人，她說：「人哋傷害咗我十幾年，人哋用謊言不停咁話我，不停講大話就得，我講幾句真話就
至於張立公開力撐Winnie一事，林燕妮說：「呢個姓張嘅又係唔知乜嘢人，我同James一齊時都唔識佢，佢乜嘢都唔知講乜啫？一句啦！干卿底事。」問她是否對黃霑依然有恨？林燕妮語調堅決地說：「唔係，我冇事，我同佢之間嘅關係已經過咗呢個境界，唔存在憎恨，亦唔存在原諒、寬恕，我都係禪修嘅，講嘅都係做個好人，我只係講事實啫。」林燕妮謂連日來收到過百傳媒的電話，又有記者在其家門外守候，故已暫時搬離寓所。
採訪、攝影：駱華齡、林妙萍
