幾個月前有朋友見到賓架L，見佢成個人瘦晒，似乎有病喎，但唔敢多問。呢個年頭，雖然話纖體成風，但無論男女，突然之間瘦得緊要，多數係有啲事嘅。賓架L最近出現公眾場合，咦，又見佢肥番啲噃，點解咁神奇？朋友八卦心起，周圍打聽，先知道賓架L引用銀行嘅醫療保險，做詳細體檢，唉吔，發覺肺部有黑點，體檢醫生懷疑係肺癌，賓架L立即搵第二位醫生再睇一次，結論相同，於是茶飯不思，成個人落晒形。癌症與心臟病係香港最厲害嘅殺手，唔怕就有鬼。
賓架L後來知道有微創心胸手術呢回事，開胸檢驗比較簡單，於是到港島A醫院搵到Y教授，用微創心胸手術切除肺片組織檢查，發覺只係良性組織啫，冇肺癌，於是放下心頭大石，成身鬆晒，體重立即回升。
最近黃霑逝世，主因好似係肺炎併發症。黃霑今年二月二十二日在《東周刊》專欄講過佢自己患上肺癌，就搵過中文大學醫學院外科講座教授及心胸外科主任嚴秉泉博士做過「微創心胸外科」手術，據黃霑講，以前開胸係大手術，病人背部做切口，延伸到胸部前面，胸壁肌肉，要大部份割開，而且要擴開肋骨，因為咁樣，傷口大，好痛，手術完畢後，留院好耐，出院之後要長期休息，每有天氣轉變，傷口會非常痛。黃霑就接受最新嘅微創手術，自己醒來後全無痛楚，第二日落床，第三日出院，第四日就可以到公園散步，經過多次寒暑，傷口完全冇痛過。
翻查《蘋果》，黃霑喺○一年發現有肺癌，其後施手術（即係佢講嘅微創心胸手術及進行化療），卒之延命三年，霑叔喺《面對面岑建勳》節目話（今年四月），自己咁嘅生活習慣，算執到咯。