多得「威力十足」嘅英國傳媒所做嘅好事，近來關於西班牙球壇嘅種族歧視消息愈傳愈烈；今季西甲聯升班馬基達菲終於帶頭用行動來「反抗」，佢哋表示將會喺下一場主場賽事，該隊球員會用鞋油塗黑塊面上場比賽，以示佢哋並無歧視黑人之意。
呢個行動真係噱頭十足，佢哋下一場主場賽事，就係本月中嘅聯賽對維拉利爾；照睇呢個戲碼，冇皇馬、巴塞、華倫及拉科呢四強壓陣，香港嘅球迷應該冇緣收看直播嘞。
我求大俠都想畀啲意見佢哋，最緊要搵隻好啲嘅鞋油，一陣班球員踢到身水身汗，又或者落雨俾水一沖，流咁啲入口食埋落肚就唔好啦。無論如何，佢哋呢個舉動出發點都係好嘅，但效果會點，真係天曉得嘞。
最近歐元兌美元屢創新高，對一批喺歐洲搵食球員嚟講真係好事，惟獨柏林哈化前鋒馬些連奴例外。呢位巴西前鋒○二年續約時要求用美金出糧，因為當時美金兌換率比歐元高。𠵱家美元兌歐元屢創新低，馬些連奴今年就少收成四十五萬歐元，如果美元繼續弱勢，真係蝕底囉！
屈福特入咗英聯賽盃四強後，話好想同曼聯爭入決賽，事關曼聯嗰奧脫福球場坐成七萬人，連埋轉播費在內，隨時執到成一百萬鎊，但𠵱家抽到對利物浦，難免有啲失望。但利物浦出名海鮮波，對弱隊不時會失準，若然屈福特入到決賽，肯定可執好多，佢哋應高興至真。
國米後衞米赫洛域最近就同相交多年嘅波班鬧翻。話說做緊評述員嘅波班批評米赫洛域係時候收山，被撩㷫嘅「米赫」反擊，叫波班收口唔好再講佢。據「米赫」講，佢七歲已經識波班，私交甚篤，好奇怪波班會咁講喎。希望原因唔係因為一個係塞黑人，一個係克羅地亞人啦。
西班牙國家隊教練阿拉干尼斯日前話家人要求佢辭職。講到尾又係為咗佢之前講過有種族歧視成份嘅言論，俾人話佢係種族歧視分子，連家人都受牽連。自從佢彈過亨利係黑鬼後，部份傳媒確針對住佢。老人家講嘢直腸直肚，如果真係因為咁要辭職，就幾唔值得啦。