臨近年尾，又係各大唱片公司扭六壬爭獎嘅時候，噚日本報就接獲投訴，有位自稱係正東唱片工作人員嘅家屬來電，投訴正東高層黃劍濤近日下令搜集員工家屬嘅姓名同身份證號碼，作為樂壇頒獎禮網上投票之用，至於投票嘅歌手人選，就係正東旗下嘅許志安同陳慧琳（Kelly），由於啲員工擔心唔應承會被炒，所以都好「聽話」，向公司交出家屬資料。
對於呢件事，正東唱片部宣傳經理Todd噚日就話係有同公司同事、同埋叫同事搵埋啲fans話投旗下歌手一票，但就絕對冇叫員工交出屋企人嘅資料。Todd話臨近年尾，自己作為公司一分子，係好順理成章叫公司同事支持旗下歌手，佢一啲都唔覺得有問題，重相信間間唱片公司都會有同樣做法。
Todd好強調自己絕冇同同事講過話唔畀資料就炒之類嘅說話，如果啲員工咁冇歸屬感，幫公司做少少嘢都覺得好核突嘅話，咁就真係不如唔好做。繼馮仁昭話，正東又唔使咁在意嘅，年尾實在好多呢啲傳言，只要行得正企得正就乜都唔使驚喇！
S.H.E新出嘅大碟《ENCORE》喺台灣賣得唔錯，唱片公司知道後即刻派新歌上場，乘勝追擊。為咗配合新歌《對號入座》，S.H.E特別着上咗度身訂做嘅disco服裝，幾個人都成身閃閃咁好搶眼。其中Ella打扮得最誇張，佢以經典嘅波蘿頭配上髮帶，手上面重戴咗一大串首飾出場，最搶眼嘅係佢一身金色緊身褲，佢重笑話自己似少林寺嘅十八銅人㖭。
夏韶聲平安夜將會喺會展開演唱會，噚日佢為演唱會喺尖沙嘴開記者會，其間佢為咗紀念已故嘅黃霑，重即場彈咗一首《結他低泣時》，夏韶聲話霑叔生前曾經講過好鍾意呢首歌。講到填詞人林振強同黃霑先後逝世，其中林振強曾為夏韶聲嘅歌曲包括《空櫈》、《結他低泣時》同《交叉點》填詞，夏韶聲話：「我同林振強最friend，不過霑叔都好博學多才，所以喺音樂會上我會唱霑叔嘅《問我》。」
問冇返嚟香港一排嘅夏韶聲知唔知樂壇出現咗「新四大天王」，佢日前接受訪問時話：「我冇聽過，我識佢哋個名，但未聽過佢哋嘅歌。新一批歌手我有印象嘅只係陳奕迅。」
達明一派噚日到九龍灣為演唱會綵排，佢哋透露舞台設計將會有一隻恐龍化石延展成個舞台，單係製作費已經成七位數字，而黃耀明重話會喺演唱會上揀唱黃霑嘅歌曲，向霑叔致敬。佢哋重呼籲到時嚟睇演唱會嘅歌迷要着上制服到場，話到時一定全場都係制服誘惑。
黃家強噚日以樂評人身份去商台做節目嘉賓，佢話由六首歌揀三首做今個禮拜嘅冠、亞、季軍，佢就揀咗張敬軒嘅《Blessing》做冠軍。不過許志安同葉德嫻合唱嗰首《美中不足》第二個版本，就連三甲都入唔到，家強就話佢自己唔揀嗰首歌，只係覺得冇新意，音樂唔協調，絕對同近日Beyond同許志安嘅不和言論冇關喎。
