出名有愛心嘅鮮魚行學校校長梁紀昌，噚日同八方講，話下年香港迪士尼樂園開幕日，會帶晒由𠵱家起到下年九月交齊功課嘅同學去玩當獎勵，希望全校學生可以一齊去，等佢哋見識一下。啲學生聽到當然好雀躍，之不過有啲成日欠交功課嘅學生就話「無得去迪士尼咪去通州街公園囉！」激到梁校長生蝦咁跳。為咗迫令同學交功課，以後欠交功課嘅同學都要留堂到做完為止，重要家長嚟接放學，如果家長夜晚十一點都唔嚟湊，佢就會報警。
點解搞到要報警咁嚴重呢？梁校長講起某啲家長就勞氣，佢話有啲家長真係完全唔理啲仔女，早餐錢唔畀，午飯又唔訂，重要校服都唔買，所以要告嗰啲不負責任嘅家長「疏忽照顧」咁話。咁又係嘅，難得間學校「鹹魚翻生」，校長同老師嘔心瀝血教學，家長都好應該盡番責任，小朋友都要長進啲。梁校長又話就快會出書講護校嘅經驗，版稅會全部用喺學校度，希望畀其他同樣遭遇嘅學校參考吓。
（圖）梁校長請晒交齊功課嘅同學去香港迪士尼樂園玩，同學聽到都非常雀躍。
傳真︰2623-9278
電郵︰