一向與運動員有緣的葉璇前晚到中環出席派對，席間她與中國高球手張連偉談笑風生，同場出席還包括體操名將李小雙，葉璇更稱對方是「好朋友」，但原來二人只見過一次面唱K，對方更可能認不出她。
葉璇、李玟胞姊李思林與男友鍾再思、王敏德、任達華等，前晚到中環Isola出席「Omega香港高爾夫球公開賽頒獎禮及派對」。
葉璇穿上低腰牛仔褲、短furjacket，露出性感腰肢，她表示自己大病初癒，更即場乾咳兩聲。葉璇說：「我身體好差，月中重要去廣西拍劇，所以要準備大量暖氈、天蠶衣。」
提到高爾夫球，她表示自己大學時代玩過，近年重新執起球棒，她說：「我嘅好朋友李小雙（前奧運金牌體操選手）都會嚟，佢打波都幾好。」問她可有叫對方指點一下，她即說：「見到面先啦，其實我哋都係見過一次面，唱卡拉ＯＫ，唔知佢重認唔認得我呢？」隨即又大讚李小雙歌喉好，唱歌似劉德華。
至於緋聞男友熊倪，葉璇說：「唔好講咁多啦，觀眾冇興趣㗎喇。」問她是否對運動員特別有好感，她說：「唔係，有時係工作人員介紹，咁上次我主持奧運都識咗啲運動員朋友。」
此外，李思林與男友鍾再思前晚手拖手公開露面，只見鍾再思手部受傷，李思林透露男友在上海做gym扭傷。
鍾再思則大談電影，他表示香港電影不會成為歷史，但暫不會再投資拍片，他說：「《飛鷹》唔係最難睇啫，香港只收三百萬，創出我新低，令我痛定思痛，不再投資住，改搞內地電視台，至少電視冇翻版。」
採訪：JessicaNgan
攝影：MatthewLam
