內置電池嘅產品，最麻煩就係冇電！事關唔係話隨處都可以叉電。當中佼佼者都要數呢期勁熱嘅iPod、iPodphoto同iPodmini，據知呢期佢哋嘅去貨好凌厲，不過電源問題一日唔解決，各用家相信心裏硬係有條刺！
日本嗰邊最近新出了一款專畀iPod系列使用的太陽能電池──BES-IP-000001，設計真係非常頂癮！機身設有三片花瓣形嘅太陽能收集器，只要經太陽8至10小時嘅直接照射，就可以直駁iPod作叉電使用；如果又咁唔好彩地，你出街時間經常不見天日，你亦可用普通電插蘇作事先叉電（約需5小時），咁樣佢就會成為你部iPod嘅後備電池！
據知BES-IP-000001會喺12月中在日本正式開賣，價錢為13,440日圓（約港幣$1,000），都真係幾貴，所以未知香港水貨商是否入貨。此外，呢部太陽能電池「花花」，遲吓重會推出PDA同手機（好似話Nokia、SONYERICSSON、Motorola都有份）版本，呢個變異版本，好似能令更多人受惠！
記者：朱崇德
