紅灣半島醜聞，都唔知點收科，鬍鬚孫賤賣土地，地產商在商言商，污染無道，不過拆樓有理，環保團體同埋民間，一致怨氣沸騰！
若然呢個政府有強勢行政主導，或者有集體責任制，咁其他官員，係咪寧願收口唔出聲，都唔好加把口一齊柴台先？
不過，主管環境及運輸嘅廖冬冬，一向大情大性，今次就加把口入嚟，話「絕對唔支持」紅灣半島拆卸喎！咁無形中，即是環保反拆派，得到咗一名問責高官撐腰，勇鬥地產商，狂踩孫明揚，有冬冬撐腰，當堂如虎添翼㖭。
最好笑嘅就係冬冬竟然話，佢個人認為，拆卸紅島，一定要做到「零廢物」，呢啲說話，學足共官口氣，例如工業要做到「零意外」，建設要做到「零浪費」，零乜零物，好似好強人作風，不過好可惜，團夥呢個失敗班子，七年半以來，展示嘅係「零IQ」，用人管理有冇「零廢料」？睇吓三屍十一焗，加埋阿董自己呢個班底，咪一眼望晒囉！
現時團夥最大嘅悲哀，就係人人同床異夢，一盤散沙，團夥之中，不但有幾個候實第三屆特首個寶座，各自表演生吞滾油、心口碎大石，而且一人有難，其他人不但陰陰笑睇嘢，重要失驚無神整句落井下石嘅暗箭出嚟，慌你唔死咁款！
拆唔拆紅島，呢樣係市場決定，廖冬冬管環保，唔通佢又同新地管埋盤數？做得高官，就冇「個人」身份！佢個人認為，反對拆卸，要做到零廢料，就即是代表三屍十一焗全體行政會議嘅立場！
冬冬聲稱，極不支持拆卸，咁即是點？係咪向市場力量施壓？若然唔拆卸，咁係咪由政府出高價向地產商買番佢，啃番轉頭？冬冬點樣去監察？係咪派員去現場、親自教點拆出嚟嘅廁所、門板、窗框、同埋每一塊石屎，睇住好似堆積木咁，運晒上車，送上大陸，將呢堆嗟來之食嘅建築排洩物，當做珍餚百味，用天價賣畀大陸九加二泛珠角地區，畀佢哋用嚟同啲煤礦工人搭建民居，更好地體現九加二泛珠角大合作？
若然冬冬帶頭高呼反拆卸，咁長毛就可以借力，聯同環保分子，走去用條鐵鏈，將自己綁住喺紅島棟樓底，實行「人在樓在，人亡樓亡」，築成血肉長城實行護樓敢死大行動，到時冬冬至緊要親自到場餵飯送水、打氣慰勞喎！
傳真︰2623-9278
電郵︰