一代鬼才黃霑上周因肺癌惡化逝世後，昨日其遺體在家人目送下於哥連臣角火化，未有舉行大型喪禮。黃霑生前好友都沒機會送他最後一程，大部份人都表示感到可惜，但願意尊重霑叔意願。劉德華更指霑叔此舉很瀟灑，雷頌德則謂送不到霑叔最後一程，不及從此見不到他可惜。
著名填詞人黃霑上周三凌晨逝世，其家人一直未有對外公布身後事的安排，直至昨日才由蕭潮順舉行記者會交代，但在記者會舉行前，黃霑的家人已依照霑叔生前意願，在哥連臣角火葬場將其遺體火化，沒有舉行繁複的喪禮，一切簡單而低調地進行，霑叔一班好友連送其最後一程的機會都沒有。對此有人認為十分可惜，亦有人指霑叔此舉十分瀟灑。
劉德華昨日到港台出席頒獎禮記者會時說：「霑叔一向低調，佢身邊啲朋友個個都知，可能佢唔想打擾人，或者唔想鋪張。𠵱家咁樣迎合佢一笑西去，好瀟灑！」對於無法見霑叔最後一面，華仔說：「唔可以話可唔可惜嘅，唔可以話鞠唔鞠到躬，因為今次佢嘅離開亦算係佢人生嘅一部份，低調嘅方法都係霑叔嘅心願，如果再去批評嘅就唔係佢嘅朋友。」提到近日有人借霑叔名義搞慈善活動，華仔說：「如果個活動真係為做善事，就算用霑叔個名，相信霑叔都會OK，但係若果唔係真係做慈善，咁啲人就要反省吓。」
而與霑叔相識二十多年兼是其徒弟的雷頌德，昨日到商台接受訪問時說：「都係頭先助手同我講先知，兩件事（病逝及火化）都好突然，但我會尊重佢屋企人嘅決定。其實發生件事後，我有打過電話畀佢老婆Winnie，第一次佢冇覆，開頭都有聽講過話有喪禮，但都係好隱晦咁講，唔係講得好詳細。我自己亦都諗住會去。𠵱家見唔到佢最後一面，都唔及見唔到佢生前嘅樣可惜。平時同霑叔都有定時見吓面食飯，重諗住咁耐冇見想約佢食飯。我嘅心情𠵱家平復好多，佢留畀我哋回憶都係開心嘅，𠵱家諗起都會笑。」
問到會否創作一首歌紀念霑叔時，雷頌德說：「係有首歌紀念佢，但我就算作咗都唔會講，我知就算係佢，佢實唔會咁做，所以我都唔會做。佢之前教咗我好多嘢，我作嘅每首歌都有佢嘅精神。」
至於填詞人林夕昨日在商台對於霑叔遺體匆匆火化一事感到突然，他說：「我都係做節目期間先知，覺得好突然，本來有話佢六、七號會有儀式，我本來七號生日，諗住就算係會沖我都照去。𠵱家送唔到佢，都會尊重佢，但相信全香港嘅人都想向佢致敬。」提到顧嘉煇寫來紀念好友霑叔的歌曲，欲找林夕、鄭國江及潘源良填詞，林夕說：「要聽音樂先知，而且亦要等煇哥返嚟，三個人一齊作係有啲難，如果每人作一部份就好啲囉。」
此外，張艾嘉昨日說：「我問過霑叔身邊嘅好朋友有關喪禮嘅事，聽講佢屋企人會有啲特別方式，我諗都應該嘅，佢唔止屬於屋企人同朋友，重係屬於大眾嘅。好奇怪，我唔知點解覺得佢冇死，唔覺得佢離開，佢咁多歌、嗰種開心、誇張嘅表情，好難忘，真係抹唔到嘅，所以到𠵱家為止我唔覺得霑叔走咗。我最難忘嘅係佢成日話我：『張艾嘉，你媽咪靚過你幾倍！』」
薛家燕則說：「可能都唔想搞到啲朋友，但其實我哋都唔知做到啲乜嘢，之前自己都擔心冇時間出席霑叔葬禮，既然佢屋企人簡單低調處理我哋都尊重。」
容祖兒昨日則說：「其實要依據番佢本人意願，佢一向低調，相信佢想俾人記得佢健康、開心嘅樣。」
採訪、攝影：王連連
