外圍偏軟，但港股先跌後反彈，足見市場游資充足，恒指全日收報14162，升102點，高低波幅逾200點，成交金額202.41億元。黑客話午後港股有挾倉味道，亦可能係芬佬櫥窗粉飾活動的開始。荷銀預期12月恒指可上試萬五點，如果真係到岸，相信唔少芬佬今年所獲派的花紅會相當和味。
領匯（2382）下周開始公開發售，噚日立法會議員大肆批評政府賤賣資產，又話明益外資，孫公就話可以彈性增加散戶分派比例。若果政府要提高散戶分派比例，就唔該早啲出聲，免得打亂散戶的孖展認購策略，到頭來又畀股民大鬧一餐。
政府是否賤賣資產，阿虎唔識講，但阿虎就好驚領匯上市後，孫公會收緊公屋政策，大量迫走富戶，令到公屋剩下老弱及最需要綜援人士，到時公屋商場及停車場租值就肯定凍過水，能否維持股息率在6%以上頗成疑問。
姑勿論領匯能否成功上市，但上市消息已吸引到散戶注目，據聞唔少準備認購領匯的散戶，同時玩埋其他新股，令到近期的新股認購情況相當理想，神威（2877）超購230倍，以上限4.36元定價，利和（2387）亦傳超購百幾二百倍，看來新股熱潮重有排玩。
電盈（008）閃電配售盈大（432），雖然大部份落入友好芬佬手上，但仍然嚇親街坊，德銀雖出手接貨，盈大仍低見2.35元，最後收2.425元，跌8.49%，連配股價2.48元亦守唔住，成交金額增至2.9億元。大市早段跌逾百點，盈大遭拋售亦無可厚非，但午後港股反彈，盈大跌幅僅略為收窄，實在肉酸。
阿虎