睇過明珠台節目飛黃騰達嘅觀眾，相信對美籍贊助商DonaldJ.Trump唔會陌生，呢位商業奇才喺美國專發展優質房地產，近年進軍加拿大市場。
噚日當奴位公子親臨香港，推介喺多倫多市中心嘅首個合作發展項目TrumpInternationalHotel&Tower。
呢幢七十層高嘅五星級酒店連住宅，酒店房有二百六十五間，最平四百三萬港銀；一百零九個住宅單位，最平大約一千萬，約四千五蚊呎，海外已賣出超過兩成。
物業唔單止係全區最高最豪華，成交期更長達五年，首期只畀兩成，投資靈活性較香港樓花更大。幢樓要○九年至起好。
華懋沙田碧濤花園三期推出新座翠栢閣，華懋售樓部經理吳崇武就覺得，呢座堪稱「沙田瑰寶」，重係「三最」之選，包括沙田最靚景觀，翻新後就係華懋最靚用料嘅新盤，以及沙田分層單位最大。
為咗配合「瑰寶」稱號，中原會送買家價值三萬八嘅「翡翠玉石」，名額三個。翠栢閣將會開放三個全新示範單位，吳崇武重話，單位平均呎價，要五千五蚊，河景及山景戶呎價，則會有一千蚊嘅差別。
將軍澳夢幻之城呢個十年建屋大計，講咗咁多年，終於都開始邀請發展商遞意向書，噚日世邦魏理仕嘅樓市分析記者會，都有人問到呢個項目。亞洲區估值及諮詢部執行董事余錦雄覺得，招標反應照計會幾熱烈，因為發展商土儲唔夠，會積極參與。
項目規模有番咁上下，余錦雄就話，目前市場睇好樓市前景，大型項目推出，亦未至於會對供應量造成好大壓力，所以影響都只不過係中性，中小型住宅樓價，來年重有升值條件。
耶穌誕前樓市例靜，短炒嘅專業人士，通常都會早早走貨，但係近大半年太多業餘投機者，加入炒樓，又再出現平手甚至損手離場例子。好似東涌映灣園二期咁，一炒家八月份以一百九十三萬，摸入七座低層D室，八六五呎，點知放咗幾個月都冇人肯高價承接，物業又即將入伙，為免上會，只好以一百九十八萬脫手，除清雜費，平手離場已算萬幸。利嘉閣劉俊傑話，個單位呎價二二八九元，比市價低一成，重係過去三個月來新低㖭。
電郵地址：
